"კარფური" რეგიონებში გაფართოებას გეგმავს
„კარფური“ საქართველოს რეგიონებში გაფართოებას გეგმავს. როგორც „ბიზნესპარტნიორთან“ „კარფურ საქართველოს“ გენერალურმა დირექტორმა ჟერომ აკელმა განუცხადა, კომპანიის გეგმა სწორედ რეგიონების ათვისებას უკავშირდება.
„ჩვენ გვსურს „კარფური“ გაიზარდოს რეგიონებში. ძალიან მალე გავხსნით ძალიან დიდ მაღაზიას გორში. ახლახანს გავხსენით ზუგდიდში, წარმოდგენილი ვართ ფოთსა და თელავში. ასე რომ გავდივართ რეგიონებში“ - აცხადებს ჟერომ აკელი.
მისივე თქმით, „კარფური“ აქცენტს აკეთებს მსხვილი მაღაზიების განვითარებაზე და მომხმარებლისთვის მრავალფეროვანი ასორტიმენტის შეთავაზებაზე.
„მაგრამ რადგანაც მოსახლეობა ფართოდ გაშლილია და ყველას არ შეუძლია ესტუმროს ჰიპერმარკეტებს, ჩვენ მზად ვართ უფრო პატარ-პატარა ობიექტების ქსელზე ვიმუშაოთ და ამას უკვე ვაკეთებთ ბრენდის ქვეშ სახელად „კაფრურ სითი“- განმარტავს „კარფურ საქართველოს“ გენერალური დირექტორი.
როგორც ჟერომ აკელი ამბობს, კომპანია სხვადასხვა გზით გაფართოების შესაძლებლობებს ეძებს - რაც ნიშნავს იმასაც, რომ „კარფური“ ასევე თანამშრომლობს სხვადასხვა ანტრეპრენერებთან მათთვის ფრენჩაიზის გადაცემის მიმართულებით.
