Kairos Logistics-ი წლის ბოლომდე თბილისში A კლასის ლოგისტიკურ ცენტრს გახსნის

Kairos Logistics-ი ლოგისტიკური ცენტრის პროექტზე მუშაობს. როგორც „ბიზნესპარტნიორს“ ცნობილი გადამზიდავი კომპანიის დირექტორმა მიხეილ ნამადოვმა განუცხადა, მშენებლობის პროექტი, სავარაუდოდ, წლის ბოლოსთვის დასრულდება.

„აქტიურად ვმუშაობთ ნებართვის აღებაზე. ეს იქნება უმაღლესი კლასის ლოგისტიკური ცენტრი, რომლის მსგავსიც საქართველოში ჯერ არ არის. ცენტრი თბილისის შემოვლით გზასთან, ახალი ტექნოლოგიებით შენდება და ამ ტექნოლოგიების წყალობით, პატარა ტერიტორიაზე დატევის მაქსიმალურ კოეფიციენტს მივიღებთ, რითიც ეს ცენტრი ინოვაციური იქნება“, - აღნიშნა მიხეილ ნამადოვმა.

მისივე თქმით, გარდა ამისა, Kairos Logistics ყაზახეთის ფილიალს ავითარებს, ვითარდება ფოთის ფილიალიც და ადგილზე ფართოვდება სასაწყობე მეურნეობა.

„ამასთან, ვმუშაობთ ევროპა-შუა აზიის მიმართულებაზე, რომ ეს ჯაჭვი ავიზიდოთ მაქსიმალურად და მოვიზიდოთ ახალი ტვირთები“, - განმარტა Kairos Logistics-ის დირექტორმა.

შეგახსენებთ, კომპანია Kairos Logisitcs ახორციელებს ნებისმიერი სირთულის გადაზიდვებს, მთელი მსოფლიოს მასშტაბით.