"ისი-პარი" ნიშ პარფიუმერიის მიმართულების განვითარებას გეგმავს

"ისი-პარი“ ნიშ პარფიუმერიის მიმართულების განვითარებას გეგმავს. ცნობილმა პარფიუმერულმა კომპანიამ აღნიშნული მიმართულება გასული წლის ბოლოს დაიმატა და წელს ნიშ პარფიუმერიაში მომხმარებელს კიდევ უფრო მეტ სიახლეს შესთავაზებს. 

როგორც „ბიზნესპარტნიორს“ „ისი-პარის“ კონტენტის მენეჯერმა ლინა ქალდანმა განუცხადა,ნიშ პარფიუმერიის (მაღალი საფასო სეგმენტის და ბუნებრივ ინგრედიენტებზე დამზადებული პროდუქცია) განვითარება მასზე მაღალმა მოთხოვნამ განაპირობა. 

გარდა ამისა, კომპანია ქსელის გაფართოებასაც განაგრძობს. პარფიუმერულმა კომპანიამ 2022 წელს კიდევ ერთი ფილიალი დაიმატა, რომელიც ზუგდიდში გაიხსნა.

„2023 წელიც არ იქნება გამონაკლისი და „ისი-პარი“ საქართველოს მასშტაბით ახალ ფილიალებს გახსნის. მათ შორის, სიახლეები გვექნება რეგიონების კუთხით, თუმცა ამ ეტაპზე, კონკრეტულ ქალაქებს ვერ დავასახელებთ“, - აღნიშნა ლინა ქალდანმა.

შპს „პრესტიჟი“ ბაზარზე „ისი-პარის“ სავაჭრო ნიშნით საქმიანობს. კომპანიის  ძირითად საქმიანობას წარმოადგენს კოსმეტიკური და პარფიუმერული პროდუქტით საცალო და საბითუმო ვაჭრობა.

დღეს საქართველოს პარფიუმერიულ ბაზარზე „ისი პარი“ 20 მაღაზიითაა წარმოდგენილი.

“ისი-პარის“ მაღაზიებში 80-მდე  პარფიუმერული სახელია წარმოდგენილი: Chanel , Hermes, Sisley, Shiseido, YSL, Lancome, Narciso Rodriguez, Dolce & Gabbana, Gucci, Chloe, Burberry, Bvlgari, Versace, J.P. Gaultier, I. Miyake, C. Klein, C. Herrera, Marc Jacobs, Cartier  და სხვა.