ისი-პარი: ჩვენი მომხმარებლების ასაკობრივი კატეგორია საგრძნობლად შეიცვალა

"ისი-პარი"  ახალი პარფიუმერული ბრენდების შემოყვანაზე მუშაობს. როგორც „ბიზნესპარტნიორს“ „ისი-პარის“ კონტენტის მენეჯერმა ლინა ქალდანმა განუცხადა, თანამშრომლობაზე მოლაპარაკებები რამდენიმე ბრენდთან მიმდინარეობს, თუმცა, პარფიუმერულ კომპანიას სიახლეები აქვს უკვე არსებულ ბრენდებთან მიმართებითაც.

„მოგეხსენებათ „ისი-პარის“ მაღაზიათა ქსელში 90-ამდე ბრენდია წარმოდგენილი და მათ უდიდეს ნაწილს საგაზაფხულოდ სიახლეები აქვს საკუთარი მომხმარებლებისთვის. ძალიან ბევრი ახალი არომატი შექმნეს მათ, განსაკუთრებით კი, ქალბატონებისთვის და საერთაშორისო ბაზრებზე ამ არომატების გამოსვლიდან, მაქსიმუმ 10 დღეში, ისინი უკვე ჩვენს თაროებზეც გამოჩნდა“, - აღნიშნა ლინა ქალდანმა.

„ისი-პარის“ კონტენტის მენეჯერმა „ბიზნესპარტნიორთან“ კომპანიის მომხმარებლებზეც ისაუბრა და თქვა, რომ მყიდველების ასაკობრივი კატეგორია მნიშვნელოვნად შეცვლილია.

„თუ ადრე, „ისი-პარის“ მომხმარებლები 30 წლიდან ზემოთ პირები იყვნენ, ამ ეტაპზე, ისინი 20 წლიდან ზემოთ არიან. თუმცა, ყველაზე მეტი მომხმარებელი მაინც 30-დან 50 წლამდე ასაკობრივ კატეგორიაში გვყავს“,- განმარტა „ისი-პარის“ კონტენტის მენეჯერმა.

შპს „პრესტიჟი“ ბაზარზე „ისი-პარის“ სავაჭრო ნიშნით საქმიანობს. კომპანიის  ძირითად მიმართულებას წარმოადგენს კოსმეტიკური და პარფიუმერული პროდუქტით საცალო და საბითუმო ვაჭრობა. დღეს, საქართველოს პარფიუმერიულ ბაზარზე „ისი პარი“ 20 მაღაზიითაა წარმოდგენილი.

“ისი-პარის“ მაღაზიებში 90-მდე  პარფიუმერული სახელია წარმოდგენილი: Chanel , Hermes, Sisley, Shiseido, YSL, Lancome, Narciso Rodriguez, Dolce & Gabbana, Gucci, Chloe, Burberry, Bvlgari, Versace, J.P. Gaultier, I. Miyake, C. Klein, C. Herrera, Marc Jacobs, Cartier  და სხვა.