"ინსპირაცია" წლის ბოლომდე მამაკაცის ხაზის წარმოებას გეგმავს
ტანსაცმლის ატელიე და მაღაზია „ინსპირაცია“ წლის ბოლომდე მამაკაცის ტანსაცმლის წარმოებას გეგმავს. როგორც „ბიზნესპარტნიორთან“ კომპანიის დამფუძნებელი მარიამ კალანდაძე აცხადებს, მამაკაცის ხაზი სარეალიზაციო ქსელში „ასიმეტრიის“ ბრენდის ქვეშ გაიყიდება.
„ვაპირებთ თავისუფალი სტილის მაისურებისა და შარვლების წარმოებას. ამ ეტაპზე კოლექციიის შექმნის პროცესია, შესაბამისად, დამატებით დეტალებს ვერ გავასაჯაროვებთ. რაც შეეხება ფასებს, მამაკაცის ტანსაცმელი 80 ლარიდან 150 ლარის ფარგლებში იქნება წარმოდგენილი,“-აცხადებს კალანდაძე.
„ინსპირაციის“ დამფუძნებელი სექტორში არსებულ გამოწვევებზეც საუბრობს და აღნიშნავს,რომ სახელმწიფოს მხრიდან არ არსებობს დიხაინერების მიმართ სათანადო ხელშეწყობა, რომელიც სამომავლოდ მათ პროდუქციის რეალიზაციაში დაეხმარება.
როგორც კალანდაძე აღნიშნავს, ამ დროისთვის „ინსპირაციის“ მიერ შექმნილი კოლექციები ონლაინ და საგამოფენო სივრცეების საშუალებით იყიდება.
„ინსპირაციის“ დამფუძნებლის განცხადებით, კომპანიას საკუთარი მაღაზია თბილისსა და ბათუმში ჰქონდა, თუმცა მოლებში არსებული მაღალი გადასახადის გამო დახურვა მოუწიათ. კალანდაძის თქმით,კომპანია ამ ეტაპზე, მაღაზიების ხელმეორედ გახსნას არ განიხილავს.
კალანდაძის განმარტებით, „ინსპირაცია“ ნედლეულს ადგილობრივ ბაზარზე ყიდულობს,თუმცა საჭიროების შემთხვევაში, ქსოვილი თურქეთიდან და დუბაიდანაც შემოაქვს.
„ინსპირაციას“ ხელფასებისა და ნედლეულის ფასის გაზრდის გამო პროდუქციაზე ფასების მომატება მოუწია, თუმცა დამფუძნებლის ინფორმაციით, კომპანია ფასების შენარჩუნებას ცდილობს.
ცნობისთვის, ტანსაცმლის ატელიე და მაღაზია „ინსპირაცია“ ბაზარზე 5 წელია ოპერირებს და ამ დროისთის ქალის ტანსაცმელს აწარმოებს.
