"იმერს" ადგილობრივ ბაზარზე ფოკუსირება არ უღირს

ქართული სამკერვალო კომპანია „იმერი“ ბრენდული მაღაზიების გაფართოების კუთხით განვითარებას ამ ეტაპზე არ გეგმავს.

როგორც „ბიზნესპარტნიორს“ კომპანიის გენერალური დირექტორის მოადგილემ ზაზა გვენეტაძემ განუცხადა, "იმერს" ორი ბრენდული  მაღაზია მხოლოდ ქუთაისში აქვს, თბილისში რამდენიმე წლის წინ არსებული ობიექტის აღდგენას კი ამ ეტაპზე აღარ აპირებს.

როგორც გვენეტაძე აცხადებს, პანდემიიდან გამომდინარე, კომპანიიის მენეჯმენტს უჭირს სამომავლო გეგმებზე ორიენტაცია, გარდა ამისა, საექსპორტო მიმართულებაზე აქცენტი შემოსავლის კუთხით ბევრად მომგებიანია, ვიდრე ადგილობრივ ბაზარზე ფოკუსირება.

„ადგილობრივ ბაზარზე  დიდი მოთხოვნა არ არის. ჩვენ წელიწადში დაახლოებით 120 000 ცალ მხოლოდ პალტოს და ნახევარპალტოს ვკერავთ. როდესაც თბილისში მაღაზია გვქონდა, წელიწადში მხოლოდ 7 000 ცალ პალტოს ვყიდიდით. განსხვავებას ხედავთ,“ - აცხადებს გვენეტაძე.

შეგახსენებთ, სამკერვალო ფაბრიკა „იმერს“ 90 წლის ისტორია აქვს, ბოლო 25 წლის განმავლობაში საწარმო უცხოელი შემკვეთებისათვის მუშაობს. პროდუქციის ძალიან მცირე ნაწილი ადგილობრივ ბაზარზეც იყიდება. კომპანიამ თბილისში (საბურთალო) არსებული მაღაზია 2019 წელს დახურა. მაშინ  მიზეზად არახელსაყრელი მდებარეობა დასახელდა.