ICR ჯგუფი: შოპინგი თერაპია აღარ არის

ICR ჯგუფის სამეთვალყურეო საბჭოს თავმჯდომარე კახა ხაზარაძე „ბიზნესპარტნიორთან“ აცხადებს, რომ დღეს პრიორიტეტი არსებული ბრენდების შენარჩუნებაა, ახალი ბრენდების შემოსვლა კი დამოკიდებულია იმაზე, თუ როგორ შენარჩუნდება ქვეყანაში ეკონომიკური სტაბილურობა.   

„ამ სიტუაციაში ICR ჯგუფი ახალი ბრენდების შემოყვანას არც განიხილავს. არსებულ ბრენდებს კი ჯგუფი ამ ეტაპზე ინარჩუნებს. რაც შეეხება აქტივობას, 13-14 მარტი პირველი შაბათ-კვირა იყო, რაც შეზღუდვების შემდეგ ვიმუშავეთ, ამიტომ, ანალიზისთვის მოკლე პერიოდია.  

ზოგადი დაკვირვებით კი,შოპინგი თერაპია აღარ არის. ადამიანი დადის აუცილებელი საჭიროებისთვის და არა სპონტანური შესყიდვებისთვის.

„ახლა სპონტანური მყიდველი აღარ არსებობს, რადგან ხალხს ბევრი პრობლემა აქვს. ჯერ მარტო, ლარის 16-17%-იანი დევალვაცია, ამას მოჰყვა ვალუტაში აღებული კრედიტები, შემდეგ ხალხი დარჩა უმუშევარი. დღეს რითეილის სავალდებულო ნაწილი რაც არის, მაგის დაკმაყოფილება ხდება. გრძელვადიან პერიოდში არ ვიცით როგორ იქნება, ქვეყნის ეკონომიკაზეა დამოკიდებული,“ - აცხადებს ხაზარაძე.  

ICR ჯგუფი ერთ-ერთი ყველაზე დიდი კომპანიაა საცალო ბიზნესის სფეროში საქართველოში. კომპანიამ 1993 წელს დაიწყო საქმიანობა ქართულ ბაზარზე და ამჟამად 1000-მდე თანამშრომელი ჰყავს.

ICR  ჯგუფი  წარმოადგენს ფეხსაცმლის, ტანსაცმლის, აქსესუარების, ავეჯის საერთაშორისო ბრენდებსა და კვების ობიექტებს.

შეგახსენებთ, 1 თებერვლიდან ქვეყანაში სავაჭრო ცენტრები გაიხსნა.