ბიზნესი
12/05/2023
ICR ჯგუფი მაღაზიების გახსნას აზერბაიჯანსა და სომხეთში გეგმავს
ICR ჯგუფი მაღაზიების გახსნას აზერბაიჯანსა და სომხეთში გეგმავს.
როგორც კომპანიის სამეთვალყურეო საბჭოს თავმჯდომარემ „ბიზნესპარტნიორს“ განუცხადა, ჯგუფში შემავალი ბრენდების ფილიალების გატანა მეზობელ ქვეყნებში 2024 წლიდან იქნება შესაძლებელი.
„პანდემიამ შეგვიშალა ხელი, თორემ უფრო ადრე გვინდოდა გაშლა სამეზობლო ქვეყნებში. ამ ეტაპზე მოლაპარაკების პროცესში ვართ და მომავალი წლიდან უნდა შევიდეთ აზერბაიჯანსა და სომხეთში. ნებისმიერ ბაზარზე გასვლა მხოლოდ ერთი ბრენდით, საკმაოდ დიდი ინვესტიციაა, ამ ყველაფერს შესაბამისი ინფრასტრუქტურის შექმნა სჭირდება და არ არის მარტივი. ამიტომ თუ გლობალურ ფორმატს განვიხილავთ, ალბათ ჯგუფის ნაწილში უფრო საინტერესოა,“-აღნიშნა კახა ხაზარაძემ.
მისივე განმარტებით, ერთ-ერთი ბრენდი, რომლითაც მომავალ წელს მეზობელ ქვეყნებში შესვლა იგეგმება, „სკარპიერაა.“
„სკარპიერას“ ფორმატი ჩვენ მიერაა შექმნილი. ვიყენებთ იტალიელ დიზაინერების შექმნილ ფეხსაცმლის მოდელებს. პროდუქცია კი იკერება აღმოსავლეთ ევროპაში და თურქეთის ქარხნებში. პანდემიის დროს ტრანსპორტირება ძალიან გაძვირდა და აუცილებლობა გახდა, რომ უახლოეს ბაზრებზე მოგვეძიებინა მწარმოებლები. „სკარპიერას“ რვა მაღაზიით ვართ დღესდღეობით წარმოდგენილი. მათ შორის ძირითადი ნაწილი თბილისშია განთავსებული, თბილისის გარდა ამ ეტაპზე მაღაზია გვაქვს ბათუმშიც. “-განმარტა კახა ხაზარაძემ.
შეგახსენებთ, ICR ჯგუფი საცალო ბიზნესის სფეროში საქართველოში ერთ-ერთი ყველაზე დიდი კომპანიაა. ჯგუფმა ოპერირება ქართულ ბაზარზე 1993 წელს დაიწყო. ჯგუფი აერთიანებს ფეხსაცმლის, ტანსაცმლის, აქსესუარების, ავეჯის საერთაშორისო ბრენდებსა და კვების ობიექტებს.
მათ შორის, ICR ჯგუფი აერთიანებს ფეხსაცმლის ისეთ ბრენდებს, როგორებიცაა: "ჯეოქსი" (იტალია), "ეკკო" (დანია), "ბატა" (იტალია), "ბამბინო" (წარმოადგენს ისეთი ცნობილი ევროპული ბრენდების საბავშვო ფეხსაცმლის ხაზებს, როგორებიცააა: "ეკკო","ჯეოქსი","ბატა", "ნატურინო", "სტარი" და სხვა), "ლაბორატორია ფეხსაცმლის გალერეა (მაღაზიაში წარმოდგენილი ბრენდებია: Paul Smith, Emporio Armani, Bikkembergs, Pollini, Premiata, Rick Owens, Philippe Model,Paciotti, Dries Van Noten, Richmond, SGL, Marni, Maison Margiela, Hotto და სხვა.), "კორსო იტალია", "ავ-ლაბი" ("ბატას" ჯგუფის წევრი).
