Hobby Georgia სავაჭრო სივრცეებს ქუთაისსა და ბათუმშიც გახსნის
ხელნაკეთი ჩანთების მწარმოებელი კომპანია Hobby Georgia გაფართოებას გეგმავს. როგორც „ბიზნესპარტნიორთან“ კომპანიის დამფუძნებელმა, ნინა ლონდარიძემ განაცხადა, კომპანია რეგიონებში ბრენდულ სავაჭრო ობიექტებს - საგამოფენო სივრცეებს გახსნის.
მისი განცხადებით, ორი თვის წინ Hobby Georgia-მ თბილისში ახალი საგამოფენო სივრცე გახსნა, სამომავლოდ ბრენდის ახალი საგამოფენო სივრცეები ბათუმსა და ქუთაისში გაიხსნება, სადაც მომხმარებელს ადგილზე შეეძლება კოლექციის დათვალიერება და პროდუქციის შეძენა.
ლონდარიძის ინფორმაციით, ქუთაისში საგამოფენო სივრცის გახსნა სექტემბრამდე იგეგმება, ხოლო ბათუმში Hobby Georgia-ს პროდუქციის შეძენა მომხმარებელს მომავალი წლიდან შეეძლება.
"ჩვენი მიმართულება არის ეკომეგობრული, რაც ნიშნავს, იმას რომ არ ვიყენებთ ნატურალურ ტყავს და ქსოვილს, აქედან გამომდინარე, ფასების დიაპაზონი განსხვავებულია. პროდუქციის ფასი 40 ლარიდან იწყება.გვინდა მაქსიმალურად ხელმისაწვდომი იყოს ხელნაკეთი ნივთი,“ - აღნიშნავს ლონდარიძე.
კომპანია ამ ეტაპზე პროდუქციის რეალიზაციას ონლაინ გაყიდვებით ახდენს, როგორც თბილისისა და რეგიონებში, ასევე საერთაშორისო მასშტაბით.
შეგახსენებთ,Hobby Georgia ბაზარზე 2017 წლიდანაა. კომპანია ორი მიმართულებით მუშაობს. პირველი - ბრენდირებული ჩანთების წარმოება, რომელიც საკუთარი დიზაინით საწარმოში მზადდება და მეორე - მსხვილ კომპანიებთან და სკოლებთან თანამშრომლობა. ამ ნაწილში კომპანია უნიფორმებსა და სხვადასხვა ნაწარმს კერავს.
Hobby Georgia სახელმწიფო პროგრამის „აწარმოე საქართველოში“ გამარჯვებულია.
