"ჰამ-ჰამი" ზოომაღაზიებშიც გაიყიდება

კომპანია „ჭკვიანი თხილის“ მიერ ოთხფეხა მეგობრებისთვის შექმნილი თხილეულის პასტა ზოომაღაზიებშიც გაიყიდება. როგორც კოპანიის თანადამფუძნებელი ნინო ანდრიაძე „ბიზნესპარტნიორთან“ აცხადებს, პასტა სახელწოდებით - „ჰამ-ჰამი“ საწყის ეტაპზე ზოომაღაზიების ერთ ქსელში შევა.

„გაზრდილი მოთხოვნიდან გამომდინარე, ვაპირებთ, რომ მხოლოდ ონლაინ აღარ გავყიდოთ ძაღლებისთვის შექნილი თხილეულის პასტა და ის ზოომაღაზიებშიც შევიტანოთ. წლის ბოლომდე, უკვე გამოჩნდება „ჰამ-ჰამი“ სარეალიზაციო ქსელში“, - აღნიშნა ნინო ანდრიაძემ.

მისივე თქმით, კომპანია ამ ეტაპზე, ოთხფეხა მეგობრებისთვის ახალი პროდუქტების შექმნას აღარ გეგმავს და არსებული ნიშური პროდუქტის ცნობადობის ზრდას აპირებს. 

როგორც ნინო ანდრიაძე განმარტავს, საქართველოში ძაღლებისთვის შექმნილ თხილეულის პასტას ანალოგი არ აქვს.

„ქვეყანაში საბედნიეროდ არის ისეთი კატეგორია, რომელსაც არ უნდა  არც თვითონ მიირთავს და არც ძაღლს აჭამოს კონსერვანტებით გაჯერებული საკვები. თხილეულის პასტა კი ამ მხრივ იდეალურია. სხავთა შორის, „ჰამ-ჰამს“ აქტიურად იყენებენ ძაღლის გაწვრთნის პროცესში, რადგან, ის ჩვენი ოთხფეხა მეგობრებისთვის ძალიან ჯანსაღი ჯილდოა,“ - აცხადებს ანდრიაძე.

შეგახსენებთ, „ჭკვიანი თხილი“ ბაზარზე 2017 წლის დეკემბერში შემოვიდა. “ჭკვიანი თხილი“ წყვილის ოჯახური ბიზნესია. მისი დამფუძნებელები ცოლ-ქმარი ნინო ანდრიაძე და შოთა მურცხვალაძე არიან. სახელწოდება კი  პროდუქტის სასარგებლო თვისებებიდან მომდინარეობს.

ამჟამად, კომპანია 5 სახეობის თხილეულის პასტას ადამიანებისთვის და 1 სახეობის პასტას ძაღლებისთვის აწარმოებს. მათ შორისაა პასტები, სახელწოდებით: „მოხერხებული მიწისთხილი“,„ჭკვიანი თხილი“, „ყოჩაღი ნუში“ ,„გიჟმაჟი  პეკანის პასტა“ და „გულადი გოგრა“.