Glamour lights - სანათები ორთქლის ეფექტით
Glamour lights, ქართული ბრენდია, რომელიც მომხმარებლებს ხელნაკეთ სანათებს სთავაზობს.
როგორც Glamour lights-ის დამფუძნებელი გიორგი თეთრაძე "ბიზნესპარტნიორთან" ამბობს, სანათები დამზადებულია თვითშრობადი თიხისგან. აქვთ სხვადასხვა ფორმა - ფრთების, ქოლგის, ბალერინის, ხის, ფერიის. განსხვავებულია მედუზა, რომელსაც ნათებასთან ერთად ორთქლის ეფექტიც აქვს.
"4 თვეა, რაც სანათებს ვამზადებ. ამბავი იქიდან დაიწყო, რომ მომეწონა ჰაერის დამატენიანებელი, რომელშიც წყალს ასხამ, აორთქლებს ცივად და ატენიანებს ჰაერს. გამიჩნდა იდეა, რომ ამ დამატენიანებლის გამოყენებით სანათი ამეწყო და მივაღებინე მედუზას ფორმა, რომელიც ნათებასთან ერთად, ორთქლსაც უშვებს. შემდეგ ამას მოჰყვა სხვადასხვა ფორმის სანათები", - აღნიშნა გიორგი თეთრაძემ.
უახლოეს მომავალში სანათები კიდევ სხვადასხვა სახეს მიიღებს.
"მინდა რვაფეხის გაკეთება, სადაც ასევე ორთქლი იქნება გამოყენებული. ასევე დავამზადებ საჰაერო ბუშტს, სადაც ცეცხლის მაგივრად ორთქლი იქნება. რომელიმე ზღაპრულ გმირში საათსაც დავამონტაჟებ", - აღნიშნა გიორგი თეთრაძემ.
სანათები მომხმარებლებისათვის ონლაინ არის ხელმისაწვდომი.
