ღვინისა და ყველის კომპანია "ბუტრანა" მაისში ტიბაანში მეორე ფერმას გახსნის

ღვინისა და ყველის კომპანია „ბუტრანა“ მაისში მეორე ფერმას გახსნის, - ამის შესახებ „ბიზნესპარტნიორს“ კომპანიის დამფუძნებელმა ჯემალ ხატიაშვილმა განუცხადა. 

მისი ინფორმაციით, ფერმის მშენებლობა აპრილში დასრულდება. 

ხატიაშვილის განცხადებით, ფერმის საინვესტიციო ღირებულება მილიონ ლარს შეადგენს.

„ჯამში გვეყოლება 50 სული მაღალპროდუქტიული საქონელი, რომლისგანაც მივიღებთ ნატურალურ, მაღალი ხარისხის რძეს, რომელსაც ყველის წარმოებაში გამოვიყენებთ. არსებული, მცირე ზომის ფერმით, ვეღარ ვაკმაყოფილებთ მომხმარებლის მოთხოვნას. გაფართოების მთავარი მიზანიც სწორედ ეს იყო. ახალი ფერმის აშენება, საშუალებას მოგვცემს წარმოება და ჩვენი პროდუქტის რეალიზაციის მასშტაბები გავზარდოთ. დაემატება დაახლოებით 5 სახეობის ყველი,“ – აცხადებს ხატიაშვილი.

ახალი ფერმის მშენებლობა, რომელიც ჯამში 10 ჰექტარ ტერიტორიას მოიცავს, სოფელ ტიბაანში, არსებულის მიმდებარე ტერიტორიაზე იგეგმება.

„ბუტრანას“ ამ ეტაპზე 20 სახეობის ყველს აწარმოებს. მაგალითად, საფერავში დაძველებული ყველი, თაფლში დავარგებული ყველი, მწვანე და წითელ პესტოში დამზადებული ყველი, თხილიანი, კენკტიანი აჯიკიანი და ა.შ.

„ბუტრანას“ ღვინისა და ყველის კომპანია სიღნაღის რეგიონში, ტიბაანში მდებარეობს. კომპანია 20–ზე მეტი სახეობის ყველს, ქვევრის ღვინოსა და სუფრის ყურძენს აწარმოებს.