გერმანელი ბავშვები ცხენოსნობაზე თეორიულ მასალებს ქართული თამაშით ისწავლიან

„თამაშობანამ“ არსებობის მანძილზე პირველად, თავისი შექმნილი სამაგიდო თამაში ექსპორტზე გაიტანა.

როგორც „ბიზნესპარტნიორს“ კომპანიის თანადამფუძნებელმა ნაუ სონღულაშვილმა განუცხადა, საექსპორტო მიმართულებით წარმატებული მოლაპარაკებები გერმანიაში, სათამაშოების საერთაშორისო გამოფენაზე, სახელწოდებით - Spielwarenmesse შედგა, რომელშიც კომპანია მიმდინარე წლის 1-5 თებერვლის პერიოდში მონაწილეობდა.

„Spielwarenmesse საკმაოდ დიდი და პოპულარული გამოფენაა. ჩვენთვის ძალიან წარმატებული აღმოჩნდა ის, რადგან პირველად გავაკეთეთ თამაში გერმანელებისთვის ანუ ფაქტობრივად, პირველი თამაში გავიტანეთ ექსპორტზე. საუბარია სამაგიდო თამაშზე, რომელიც გერმანიის ცხენოსნობის ასოციაციის დაკვეთით შევქმენით. თამაში მოიცავს თეორიული მასალის შესწავლას, ანუ როგორ უნდა ისწავლოს ბავშვმა თეორიული მასალა ცხენოსნობაზე“, -  განმარტა ნაუ სონღულშვილმა.

მისივე ინფორმაციით, ამავე გამოფენაზე „თამაშობანამ“ სხვა წარმატებებსაც მიაღწია, კერძოდ, ორი თამაშის პროტოტიპის, ილუსტრაციის და კონცეფციის შემუშავების შეკვეთა აიღო.

როგორც ნაუ სონღულაშვილი ამბობს, „თამაშობანას“ სამაგიდო თამაშების შეძენით გერმანიის გარდა, კანადა, საფრანგეთი, იტალია და ესპანეთი დაინტერესდნენ.

ცნობისთვის, „თამაშობანა“  ქართული თამაშების მწარმოებელი კომპანიაა, რომელიც  2015 წელს შეიქმნა და მომხმარებელს (ბავშვებს და მშობლებს) საგანმანათლებლო და გასართობ თამაშებს სთავაზობს.