George Grey Winery ღვინის რესტორნის ან ბრენდული ბარის გახსნას განიხილავს
George Grey Winery-მ ბრენდული მაღაზიების გახსნა გადადო. როგორც კომპანიის დამფუძნებელი და კომერციული დირექტორი გიორგი რუხაძე „ბიზნესპარტნიორთან“ აცხადებს, ეს გეგმა დღის წესრიგში ისევ რჩება, თუმცა მიმდინარე წლის ბოლომდე ბრენდული მაღაზიის გახსნა ვერ მოხერხდება.
„როდესაც ციფრებში ითვლი და ანგარიშობ, რამდენად გამართლებულია საფირმო მაღაზიების გახსნა, ამ ეტაპზე, ჩვენი კომპანიის აქტიურ მიზანში ეს არ ჯდება. ბრენდული მაღაზიის შენახვა არის საკმაოდ რთული, გააჩნია რომელ ლოკაციაზე ხარ, სად ხარ, კადრიც შესაბამისად დატრენინგებული უნდა გყავდეს, რაც არ არის ასევე მარტივად მიღწევადი. ამიტომ, მიმდინარე წლის ბოლომდე ამ პროექტის განხორციელებას ვერ შევძლებთ“,- განმარტა გიორგი რუხაძემ.
მისივე თქმით, კომპანია ბრენდული მაღაზიების გარდა, ალტერნატიულ პროექტებზეც მუშაობს.
„გუნდში განვიხილავთ ბრენდული რესტორნისა და საფირმო ბარის იდეას, სადაც ჩვენი ღვინოები და ღვინის კოქტეილები გაიყიდება. იქნება ეს ღვინის მაღაზია, რესტორანი, თუ ბარი - უნდა იყოს სახასიათო და პრემიუმ ხაზის. ამიტომ, იდეების დახვეწაზე მიდის აქტიური მუშაობა“,- აღნიშნა კომპანიის დამფუძნებელმა და კომერციულმა დირექტორმა გიორგი რუხაძემ.
შეგახსენებთ, George Grey Winery პრემიუმ კლასის ქართულ ღვინოებს აწარმოებს, მათ შორის საფერავს, ქინძმარაულს, ქვევრის რქაწითელს, ქვევრის ქისის. კომპანია საკუთარი ღვინის რეალიზაციას ადგლობრივი ბაზრის გარდა, საექსპორტო მიმართულებითაც ახდენს, კერძოდ - უზბეკეთში, აშშ-ში, ავსტრიაში, ლიხტენშტეინში, ჰონგ-კონგში, გერანიასა და სხვა ქვეყნებში.
