ფეხსაცმლის ქართული ბრენდი "აბრაგები" პანდემიის გამო ახალ პროექტებს არ გეგმავს
ქართული ბრენდი „აბრაგები“ მაღალი ხარისხის კაცისა და ქალის ფეხსაცმელს, ნატურალური მასალით ამზადებს. როგორც კომპანიის დამფუძნებელმა, მიხეილ გაბაძემ „ბიზნესპარტნიორს“ განუცხადა, პანდემიის გამო გაყიდვები დაახლოებით 80%-ით შეუმცირდა.
მიუხედავად ამისა, „აბრაგები“ არ აჩერებს წარმოებას, აგრძელებს საქმიანობას, თუმცა, ახალი ხაზის ან პროექტების ამოქმედებას ამ ეტაპზე არ გეგმავს.
„ჩვენი პროდუქტი ძირითადად, გათვლილია ტურისტებზე, შესაბამისად, საზღვრების ჩაკეტვამ და უცხოელი ვიზიტორების ნაკლებობამ, ჩვენი ბიზნესი დააზარალა და გაყიდვები საგრძნობლად შემცირდა. ადგილობრივ მყიდველს კი პანდემიამ შემოსავლები შეუმცირა, რაც ჩვენს გაყიდვებზეც აისახა,“ – აღნიშნა მიხეილ გაბაძემ.
კომპანიას აქცენტი ძირითადად მამაკაცის ფეხსაცმელზე აქვს.
„აბრაგები“ ქართულ ბაზარზე 2017 წლიდან არსებობს, რომელიც იტალიური და თურქული ნატურალური მასალებით ხელნაკეთ ფეხსაცმელებს აწარმოებს.
