ფარმაცევტულმა კომპანია "ინნოვასიმ" მზა წამლების წარმოება გადადო
ფარმაცევტულმა კომპანია „ინნოვასიმ“ მზა წამლების წარმოების პროექტი გადადო. მიზეზი პანდემია და მისგან გამოწვეული ეკონომიკური კრიზისია, რომელიც მთელი ქვეყნის და მსოფლიოს მასშტაბით დადგა.
კომპანიის ხელმძღვანელი ივანე მესხიშვილი „ბიზნესპარტნიორთან“ განმარტავს, რომ ასევე გადაიდო ახალი ქარხნის მშენებლობა, სადაც ქარხანა მზა ფორმის მედიკამენტების წარმოებაზე უნდა ყოფილიყო ორიენტირებული.
როგორც მესხიშვილი აცხადებს, კომპანია პანდემიის გამო გაჩერებული იყო და საქმიანობა დაახლოებით 1 კვირაა აღადგინა. მისი განმარტებით, კომპანია ამ დროისთვის მხოლოდ ტკივილგამაყუჩებელ მედიკამენტ ფლატიფილინს, ნახევარფაბრიკატის სახით აწარმოებს და ექსპორტზე გააქვს.
„პროდუქცია ადგილობრივ ბაზარზე არ იყიდება. მისი შეძენით ძირითადად., დსთ-ს ქვეყნები არიან დაინტერესებულნი,“ - აცხადებს მესხიშვილი.
შეგახსენებთ, კომპანია მზა წამლების წარმოების დაწყებას 2019 წლისთვის გეგმავდა. ინვესტიციის ოდენობა კი დაახლოებით 6 მილიონი ევროთი იყო განსაზღვრული.
საწარმო 2015 წელს, თბილისში, ლილოს დასახლებაში გაიხსნა. ინვესტირებულია დაახლოებით 4.5 მილიონი დოლარი.
