ეროვნული ვალუტის სიმყარე გადამწყვეტია, ეს მთავრობამ უნდა მოაგვაროს - თამაზ დაუშვილი
„იმ პირობებში, როდესაც ქვეყნის ქვეყანაში ვაჭრობის 70% იმპორტია, ლარის არასტაბილურობა ბიზნესზე საკმაოდ მძიმედ აისახება,“ - ამის შესახებ კომპანია „დიოს“ მმართველმა პარტნიორმა თამაზ დაუშვილმა გადაცემაში „ბიზნესპარტნიორის ოთხეული“ განაცხადა.
მისი განმარტებით, ეკონომიკისთვის ეროვნული ვალუტის სიმყარე გადამწყვეტია, ეს არის ფუნდამენტური საკითხი, რომელიც მთავრობამ უნდა მოაგვაროს.
„როდესაც ლარის კურსი იწევს, გარკვეული პერიოდის განმავლობაში კომპანიები ზარალობენ, შემდეგ კი ადაპტირდებიან და სწევენ ფასებს. ამით ვიღებთ შემცირებულ მოთხოვნას. ამ დროს იძულებული ხარ, ან იაფიანი საქონელი შემოიტანო, ან შეამცირო გაყიდვები და ასე შემდეგ. სტაბილური ვალუტა ძალიან მნიშვნელოვანია.
როდესაც ეროვნული ბანკი, მთავრობა, ვერ ახერხებს იმას, რომ ლარის კურსი ასე თუ ისე დაარეგულიროს და პროგნოზირებადი გახადოს, ეკონომიკის მიმართ და ქვეყნის მიმართ ნდობა, მცირდება," - აცხადებს დაუშვილი.
