ეკოინოვაციური მიდგომები და პირუტყვის გაზრდილი რაოდენობა - "ყვარლის ბაგა" ფართოვდება

ნედლ რძეზე არსებული მზარდი მოთხოვნის ფონზე, საქართველოში რძის ყველაზე დიდი მწარმოებელი „ყვარლის ბაგა“ გაფართოებაზე მუშაობს. კომპანიაში ამბობენ, რომ ამჟამად, დღეში 35 ტონა რძეს აწარმოებენ, რაც ბაზრის მოთხოვნის დასაკმაყოფილებლად საკმარისი არ არის, სწორედ ამიტომ, საქონლის დამატება განიხილება.

„ყვარლის ბაგაში“ ეკო ინოვაციური მიდგომებიც დაინერგა. ფერმა ებრაული მეთოდითაა მოწყობილი, ძროხები თავისუფალ სივრცეში, სადგომების ქვეშ არიან განთავსებულები, სადაც თითეულ ძროხაზე არის გათვალისწინებული 25 კვადრატული მეტრი სივრცე. ფერმაში დამონტაჟებულია საწველი დარბაზიც, რომელიც ასევე ებრაული წარმოებისაა და ერთ ჯერზე, 58 ძროხის წველის საშუალებას იძლევა.

„ჩვენ მუდმივად ვფართოვდებით. თანდათანობით ვამატებთ ახალ სივრცეებს ჩვენს ფერმას. ახლაც ვამატებთ რამდენიმე სადგომს ძროხებისთვის და უკვე გვაქვს დაგეგმილი და გაფორმებული ხელშეკრულება დამატებითი რაოდენობის საქონლის შემოყვანაზე. წლის ბოლომდე ჩამოვიყვანთ 132 სულს და წლის დასაწყისში იგივე რაოდენობის ჩამოყვანას ვგეგმავთ“, - განუცხადა „ბიზნესპარტნიორს“ „ყვარლის ბაგას“ დირექტორმა ნათია გარგულიამ.

დღესდღეობით, კომპანიას ჰყავს 1500-ამდე მსხვილფეხა საქონელი, სპეციალურად შერჩეული ჰოლშტეინის ჯიშის ძროხები, რომლებიც ყოველდღიურად, 22 000 ლიტრ რძეს იწველიან.