"ეფეს საქართველო" რუსთავის მერიასა და "ეკო ჯეო პეტთან" ერთად პლასტმასის ბოთლების შეგროვებასა და გადამუშავებაზე იზრუნებს
“ეფეს საქართველო” რუსთავის მერიასთან და „ეკო ჯეო პეტთან“ ერთად ახალ საპილოტე პროგრამას იწყებს, რომელიც რუსთავის მუნიციპალიტეტში ნარჩენების სეპარირებასა და გადამუშავებას ითვალისწინებს. მხარეებს შორის ურთიერთანამშრომლობის მემორანდუმი გაფორმდა.
სამმხრივ მემორანდუმს ხელი მოაწერეს „ეფეს საქართველოს“ კორპორაციულ საქმეთა დირექტორმა, ნიკოლოზ ხუნძაკიშვილმა, რუსთავის მერის მოადგილემ ბესიკ ტოგონიძემ და „ეკო ჯეო პეტის“ დირექტორმა ივან პეტრუშევსკიმ.
მნიშვნელოვანია, რომ სამმხრივი მემორანდუმის ფარგლებში შემუშავებული პროგრამა, პირველ ეტაპზე, რუსთავში, საცხოვრებელი კორპუსების 10 ეზოში მეორადი პლასტმასის ბოთლების სეპარირებისთვის განკუთვნილი ურნების განთავსებას გულისხმობს.
„ჩვენი კორპორაციული პასუხისმგებლობის ფარგლებში, ეს მორიგი გარემოსდაცვითი პროექტია. ახალი პროგრამა, რომელიც პლასტმასის (PET) ბოთლების შეგროვებასა და გადამუშავებას გულისხმობს, ვფიქრობთ, რომ რუსთავისთვის ძალიან მნიშვნელოვანი სიახლე იქნება. აღსანიშნავია, რომ ეს საპილოტე პროექტი, წარმატების შემთხვევაში, საშუალებას მოგვცემს, გავზარდოთ მასშტაბი და ასევე, საქართველოს სხვა ქალაქებშიც დავნერგოთ მსგავსი ინოვაციური მიდგომები“, – განაცხადა „ეფეს საქართველოს“ კორპორაციულ საქმეთა დირექტორმა, ნიკოლოზ ხუნძაკიშვილმა.
,,რუსთავში ვიწყებთ საპილოტე პროგრამას, რომელიც ნარჩენების სეპარირებას ითვალისწინებს. დღეს გავაფორმეთ სამმხრივი მემორანდუმი შპს ,,ეკო ჯეო პეტთან” და ,,ეფეს საქართველოსთან“ . საპილოტე პროგრამა სწორედ ამ მემორანდუმის ფარგლებში შემუშავდება და განხორციელდება. პროგრამა, გარდა იმისა, რომ ეკომეგობრულია, მნიშვნელოვანია ეკონომიკური თვალსაზრისითაც, რადგან ცირკულარული ეკონომიკის განვითარებასა და დასუფთავების ხარჯის შემცირებასაც შეუწყობს ხელს“, – განაცხადა რუსთავის მერის მოადგილემ ბესიკ ტოგონიძემ.
