ძმები არველაძეების მოცვის ბიზნესი - კომპანია პირველ მოსავალს წელს მიიღებს

ძმებმა, რეზი, შოთი და აჩი არველაძეებმა ლურჯი მოცვის ბიზნესი დაიწყეს. როგორც კომპანია „ბლუბერი ფარმის“ ერთ-ერთმა დამფუძნებელმა აჩი არველაძემ „ბიზნესპარტნიორს“ განუცხადა, ბაღები გურიაში, ოზურგეთის რაიონის სოფელ ლიხაურში 27 ჰექტარზეა გაშენებული. პროექტში რამდენიმე მილიონი ლარის ინვესტიცია ხორციელდება.

მისი განცხადებით, ბაღების გაშენება გასულ წელს დაიწყო, პირველ, სატესტო მოსავალს კი კომპანია, წელს მიიღებს. საუბარია, 20 ტონაზე მეტ მოცვზე.

„მნიშვნელოვანია, რომ პროექტი სახელმწიფო პროგრამებს “შეღავათიანი აგროკრედიტის“ და “დანერგე მომავალის“ მხარდაჭერით ხორციელდება,“ - აცხადებს აჩი არველაძე.

მისი განცხადებით, მოცვის ბაღებიდან მიღებული პროდუქცია ძირითადად ექსპორტზე იქნება ორიენტირებული. მათ შორის, აზიის, არაბთა საემიროების და რუსეთის მიმართულებით.

კომპანიის თანადამფუძნებელი ეკა ვეფხვაძე განმარტავს, რომ „ბულბერი ფარმი“  ეტაპობრივად გეგმავს ბაღების 50 ჰა-მდე ათვისებას, საიდანაც მიღებულ მოსავალს (550 ტონა)  2023 წელს ელოდება.