დუბაიში 30 ტონა ქართული მარწყვი მაისის ბოლოს გაიგზავნება

ადგილობრივი ბაზრის მომარაგების გარდა, მალე სასათბურე მეურნეობა „აგროსფეისში“ დაკრეფილი მარწყვი ექსპორტზე გავა.

როგორც კომპანიის თანადამფუძნებელი ნუცა სალუქვაძე აცხადებს, საერთაშორისო ბაზრებზე მაღალი სტანდარტის მოთხოვნა არსებობს, რაც ქართულმა მარწყვმა სრულად დაკმაყოფილა და მაისის ბოლოს, 30 ტონა მარწყვი დუბაიში გაიგზავნება.

„თანამშრომლობა რამდენიმე თვიანი იქნება, შესაბამისად, გაიზრდება საექსპორტო პარტიების მოცულობაც, შედეგად, ვეცდებით არაბთა გაერთიანებული საამიროების 10 მილიონიანი ბაზარი ავითვისოთ. ქართულ მარწყვზე მოთხოვნა ძალიან მზარდია. კონკრეტულად, ჩვენი მარწყვი უცხოურ ბაზრებზე კონკურენტუნარიანია ფასის და ხარისხის ნაწილშიც“, - განმარტა ნუცა სალუქვაძემ.

მისივე ინფორმაციით, დუბაიში მარწყვი ე.წ „ფრეშ“ სახით გაიგზვნება. „ძალიან რთული საკითხია  მარწყვის ექსპორტზე გატანა ტრანსპორტირების ნაწილში, ბევრი დეტალია გასათვალისწინებელი და ახლა, ზუსტად ამაზე ვმუშაობთ, რომ მიმდინარე თვის ბოლოს „აგროსფეისის“ მარწყვი დუბაის სავაჭრო ქსელში გამოჩნდეს“, - განარტა ნუცა სალუქვაძემ.

ცნობისთვის, სასათბურე მეურნეობა „აგროსფეისი“, რომელიც ამ ეტაპზე, საქართველოში ყველაზე დიდი რაოდენობით, კერძოდ 90 ტონა მარწყვს აწარმოებს, გაფართოებას, წარმოების 4-ჯერ გაზრდას და იმპოტირებული მარწყვის ადგილობრივით ჩანაცვლებას გეგმავს. ამ მიზნის მისაღწევად აქტიური მოლაპარაკებები პოტენციურ ინვსტორებთან მიდინარეობს.