CNICK -ი ბეჭდების გარდა, სხვა ჭკვიან ნივთებსაც დაამზადებს

ჭკვიანი ბეჭდების მწარმოებელი სტარტაპი CNICK ახალ პროდუქტებზე მუშაობას განაგრძობს.

როგორც „ბიზნესპარტნიორს“ CNICK-ის თანადამფუძნებელმა დავით კვიციანმა განუცხადა, 2 თვეში ბაზარზე ოქროს ჭკვიანი ბეჭედიც გამოჩნდება, რომელიც ასევე მრავალფუნქციური პროდუქტი იქნება და მის გამოყენებას მომხმარებელი საგადამხდელო ფუნქციით, ასევე ავტომობილის გასაღებად და საშვად შეძლებს.

„ჭკვიანი ბეჭდის განვითარების ხანგრძლივ სტრატეგიაზე ვმუშაობთ. გარდა მეტალის ჭკვიანი ბეჭდების დამზადებისა, ვგეგმავთ ბეჭდების გარდა, სხვა ჭკვიანი ნივთებიც ვაწარმოოთ. ვაპირებთ, პროდუქტის ტექნოლოგიურ დახვეწას და ახალი ფუნქციების დამატებას. ჩვენს მთავარ გეგმებშია, საქართველოში რეალიზაციის დაწყებაც და ამაზე აქტიურად ვმუშაობთ. გარდა ამისა, ვაპირებთ აზიის ბაზარზე გავზარდოთ გაყიდვები და იქ ახალი პარტნიორების მოძიების პროცესში ვართ. ვთანამშრომლობთ ავსტრალიასთანაც“, - აღნიშნა დავით კვიციანმა.

მისივე ინფორმაციით, ამჟამად, CNICK-ის ხისა და კერამიკის ჭკვიანი ბეჭდები ონლაინ რეჟიმში, მთელი მსოფლიოს მასშტაბით იყიდება. გაყიდვების რეკორდული მაჩვენებლები კი აშშ-ს ბაზარზე ფიქსირდება. ქართულ ჭკვიან ბეჭედს აქტიურად მოიხმარენ ევროპის ქვეყნებშიც და აქ ლიდერები დიდი ბრიტანეთი და გერმანია არიან.

მაისის ბოლოდან, CNICK რეალიზაციაში ვერცხლის ჭკვიან ბეჭედსაც ჩაუშვებს, რომელზე მუშაობაც უკვე დასრულებულია.

შეგახსენებთ, ინოვაციური სტარტაპი „კნიკი“  რამდენიმე წლის წინ ქართველმა სტუდენტებმა შექმნეს. ის პირველი ქართული მაღალ ტექნოლოგიური სამომხმარებლო პროდუქტია, რომელიც ადამიანებს ყოველდღიური ფინანსური, თუ სხვა ოპერაციების შესრულებაში ეხმარება.