"ჩირიფრუტში" ტკბილეულზე ფასები 10%-ით გაიზარდა

პანდემიიის შემდეგ,რუსეთ-უკრაინის ომმა საქართველოში ტკბილეულის ფასების ზრდა განაპირობა.

როგორც „ბიზნესპარტნიორს“ „ჩირიფრუტის“ საზოგადოებასთან ურთიერთობის მენეჯერმა ანა ბუკიამ განუცხადა, მათი საწარმოს მაგალითზე, შოკოლადითა და ჩირით შექმნილი ტკბილეულის ფასები, დაახლოებით, 10%-ით არის გაზრდილი.

„რუსეთ-უკრაინის ომის გამო, საკმაოდ გაგვეზარდა იმ მასალების  ტრანსპორტირების ხარჯი, რომლებსაც წარმოებაში ვიყენებთ. გაძვირებულია თავად ნედლეულიც საერთაშორისო ბაზრებზე. მართალია, ძირითადად, ნედლეულად ადგილობრივი წარმოების პროდუქტებს ვიყენებთ, მაგრამ ზოგიერთი ხილი საქართველოში საერთოდ არ მოდის, ამიტომ, გვიწევს იმპორტირება. შესაბამისად, საიმპორტო მასალების გაზრდილმა ფასებმა, 2022 წლის განმავლობაში, გაგვიძვირა წარმოება, რაც პროდუქციის ფასებზეც აისახა“, - აღნიშნა ანა ბუკიამ.

მისივე ინფორმაციით, კომპანია წელს ეცდება, არსებული ფასები შეინარჩუნოს და ზრდის მიმართულებით წელს საფასო პოლიტიკა აღარ შეცვალოს.