"ჩირიფრუტი" 2024 წლიდან ახალ საწარმოში გადავა

ქართული ტკბილეულის მწარმოებელი კომპანია „ჩირიფრუტი“ მომავალი წლიდან ახალ საწარმოში გადავა.

როგორც „ბიზნესპარტნიორს“  „ჩირიფრუტის“ თანადამფუძნებელმა სოფიო ჯიქიამ განუცხადა, კომპანიამ 1 თვის წინ, ნატახტარში საწარმოსთვის ფართი შეიძინა.  რაც შეეხება  პროექტის საინვესტიციო ღირებულებას, ჯიქია აცხადებს, რომ ამ დროისთვის კალკულაციის პროცესი მიმდინარეობს, შესაბამისად, ხარჯთაღრიცხვა მოგვიანებით დაზუსტდება.  

„უკვე დასრულებული შენობა შევიძინეთ, საჭიროა მხოლოდ რემონტი  და მანქანა-დანადგარებით აღჭურვა. სავარაუდოდ, მომავალი წლისთვის დასრულდება ეს საქმე და ამ დროისთვის, „ჩირიფრუტი“ უკვე მზად იქნება სერტიფიცირებისთვისაც. ვაპირებთ სრულიად ახალ მასშტაბებზე გასვლას. ახალი საწარმო შესაძლებლობას მოგვცემს, რომ წარმადობა სულ მცირე 3-ჯერ გავზარდოთ. შედეგად, გარდა იმისა, რომ დავამატებთ ახალ პროდუქტებს და ადგილობრივ ბაზარზე უფრო ფართოდ ვიქნებით წარმოდგენილი. კერძოდ, შევალთ ქსელურ მარკეტებში, დაგეგმილია გავალთ ექსპორტიც“, - აღნიშნა „ჩირიფრუტის“ თანადამფუძნებელმა.

მისივე ინფორმაციით, კომპანიამ საექსპორტო მოლაპარაკებები ისრაელთან და გერმანიასთან აწარმოა, შესაბამისად, როდესაც საექსპორტო რაოდენობების დაკმაყოფილებას შეძლებს, „ჩირიფრუტის“ ნაწარმი საერთაშორისო ბაზრებზეც გაიყიდება.

ცნობისთვის, „ჩირიფრუტის“ საწარმო, ამჟამად, თბილისში მდებარეობს და 20-მდე ადამიანს ასაქმებს. გაფართოების და საწარმოს ნატახტარში გადატანის შემდეგ, დასაქმებულების რაოდენობაც გაიზრდება.

დღეისათვის, კომპანია 90-მდე სახეობის სხვადასხვა პროდუქტს აწარმოებს, მათ შორის - ჩირისა და შოკოლადის კომბინაციით შექმნილ ტკბილეულს, ტყლაპებს, ჩირებს და სხვა.