ჩაის გადამამუშავებელი საწარმო MONTEA პიტნის ჩაის გამოუშვებს

ამბროლაურში მდებარე ჩაის გადამამუშავებელი საწარმო MONTEA პიტნის ჩაის გამოუშვებს. 

როგორც კომპანიის მარკეტინგის დეპარტამენტის ხელმძღვანელმა ანი ხეცურიანმა „ბიზნესპარტნიორს“ განუცხადა, ამ ეტაპზე ბრენდინგის სამუშაოები მიმდინარეობს და ახალი სახეობა ბაზარზე მალე გამოვა.

„ეს იქნება ველური პიტნის ჩაი,  ჩვენი სპეციფიკიდან გამომდინარე, პროდუქტი ტყეში უნდა იყოს შეგროვებული. გავხსნით შემგროვებელ პუნქტებსაც, სადაც მოსახელობისგანაც ჩავიბარებთ პიტნას. რა თქმა უნდა,  მოხდება მისი ლაბორატორიული შემოწმება.“-აღნიშნა ანი ხეცურიანმა.

მისივე განმარტებით, ამ ეტაპზე კომპანია 6 სახეობის ბიო ჩაის აწარმოებს, რომლის ძირითადი ნაწილი ექსპორტზე გადის, თუმცა MONTEA-ს მოკლევადიან გეგმებში ქართული ბაზრის უკეთ ათვისება დგას.

„გვინდა კიდევ უფრო მეტად გამოვჩნდეთ ადგილობრივ ბაზარზე, ეს ნიშა თავისუფალია და ვეცდებით მაქსიმალურად  ავითვისოთ არსებული  რესურსი.“-განმარტა ანი ხეცურიანმა.

Montea 300 ათას დოლარიანი ინვესტიციით, ქართულ ბაზარზე 2021 წელს გამოჩნდა. კომპანიას ამ ეტაპზე 200-ზე მეტი დასაქმებული ყავს. სეზონური სამუშაოებისას კი დასაქმებულთა რაოდენობა 600 ადამიანს აჭარბებს.