"ბუტრანამ" შატოს მშენებლობა 2024 წლამდე გადადო
ყველისა და ღვინის კომპანია „ბუტრანამ“, რომელიც სიღნაღის რაიონში, სოფელ ტიბაანში მდებარეობს, შატოს მშენებლობის დაწყება 2024 წლამდე გადადო.
როგორც „ბიზნესპარტნიორს“ კომპანიის დამფუძნებელმა ჯემალ ხატიაშვილმა განუცხადა, კომპანიის პრიორიტეტი ამ ეტაპზე საფირმო მაღაზიის და რესტორნის გახსნაა, ასევე ფერმის გაფართოების პროექტი, რომლის დასრულების შემდეგ შატოს სამშენებლო სამუშოები დაიწყება.
ეს იქნება 10 ჰექტარზე გაშენებული კომპლექსი, რომელიც მოიცავს მარანს, სადეგუსტაციო სივრცეს და 115 ნომრიან სასტუმროს.
“მიწას ვფლობთ ჩვენს ვენახებთან მიმდებარე ტერიტორიაზე, სადაც 6 ჰექტარზე უკვე გაშენებულია ვენახი და ვფიქრობთ, კიდევ 2 ჰექტარი ვაზის ახალი სახეობებს დავუთმოთ. 2 ჰექტარზე კი უშუალოდ შატო გაშენდება. პროექტის დასრულებას 2025-2026 წლისთვის ვვარაუდობთ,“ – აღნიშნა ჯემალ ხატიაშვილმა.
„ბუტრანა“ ორი სახეობის ქვევრის ღვინოს საფერავს და რქაწითელს, 20–ზე მეტი სახეობის ყველს და სუფრის ყურძენს აწარმოებს.
