Beko: წვიმების გამო, სეზონურ პროდუქციაზე ისეთი ზრდა არ არის, როგორი მოლოდინიც გვქონდა

საყოფაცხოვრებო ტექნიკის ბრენდი BEKO-ს დირექტორი მეჰმედ მელექი აცხადებს,რომ კომპანიას წინა წლის ანალოგიურ პერიოდთან შედარებით, გაყიდვების 17%-მდე ზრდა აქვს.

„თუმცა, ეს ჩვენთვის საკმარისი არ არის და ყოველთვის, უფრო მაღალ ზრდაზე ვართ ორიენტირებული. 2023 წლის პირველი კვარტალი კარგი მაჩვენებლებით დავიწყეთ, თუმცა, მეორე კვარტალში, წვიმების გამო,სეზონურ პროდუქციაზე ისეთი ზრდა არ არის, როგორი მოლოდინიც გვქონდა“, - აღნიშნა მეჰმედ მელექმა და იქვე განმარტა, რომ კომპანიას ეს ვითარება რომ შეეცვალა, მომხმარებელს მაისსა და ივნისში  ფასდაკლების აქციები შესთავაზა.

„აქციებით დავაკომპენსირეთ ის დისკომფორტი, რაც ამინდმა შექმნა. კერძოდ, გვეგონა, რომ მაცივრების და კონდიციონერების რეალიზაცია უფრო აქტიური იქნებოდა, თუმცა, საბოლოო ჯამში, გაყიდვებში ზრდა მაინც გვაქვს. ამჟამად, ყველაზე გაყიდვადი პროდუქტი სარეცხის მანქანაა“, - განმარტა მეჰმედ მელექმა.

მისივე თქმით, ბოლო პერიოდში, ქართველი მომხმარებელი ძალიან გააქტიურდა ჭურჭლის სარეცხი მანქანების შეძენის კუთხითაც და ამ პროდუქტზე მოთხოვნა ყოველდღე მზარდია.

ცნობისთვის, Beko ამ ეტაპზე, საქართველოს მასშტაბით 100-ამდე სავაჭრო წერტილს ფლობს. თანამშრომლობს მსხვილ სავაჭრო ქსელებთან, როგორებიც არის: „ბრიკორამა“, „დიმინო“, „გორგია“და „ზოდი“,  ასევე, რამდენიმე ინტერნეტ მაღაზიასთან.