BEKO: ტექნიკის ბაზრის შემცირების პროცესი დაიწყო
საყოფაცხოვრებო ტექნიკის მაღაზიათა ქსელი Beko-ს გენერალური დირექტორი მეჰმედ მელექი „ბიზნესპარტნიორთან“ აცხადებს, რომ საქართველოში ტექნიკის ბაზრის შემცირების პროცესი დაწყებულია.
მისი განცხადებით, შედარებით მცირე და საშუალო კომპანიები ბაზრიდან გადიან, საბოლოოდ, კი ბაზარზე ფინანსურად ძლიერი 5-6 კომპანია დარჩება.
„ოპერირებას გააგრძელებს ის მსხვილი კომპანიები, რომლებიც საერთაშორისო ბრენდების ექსკლუზიური იმპორტიორები არიან. 2020 წელს ტექნიკის ბაზარი რამდენიმე კომპანიამ დატოვა. პროცესი დაწყებულია,“ - აცხადებს მელექი.
მაღაზიათა ქსელი Beko-ს გენერალური დირექტორი შედარებით გააქტიურებულ გაყიდვებს უსვამს ხაზს და აცხადებს, რომ მიმდინარე წლის მარტი გაყიდვების თვალსაზრისით, ბევრად სჯობდა 2020 და 2019 წლების ანალოგიური პერიოდების მაჩვენებელს.
შეგახსენებთ, Beko-ს გენერალური დირექტორი გასული წლის ბოლოს „ბიზნესპარტნიორთან“ 2021-2022 წლიდან ტექნიკის ბაზრის მინიმუმ 20%-იან შემცირებას ვარაუდობდა.
