ასოციაცია რესტორნებში ქორწილებსა და სხვა ღონისძიებებზე შეზღუდვების მოხსნას ითხოვს
რესტორატორთა ასოციაციის თავმჯდომარე შოთა ბურჯანაძე სექტორისთვის შეზღუდვების სრულად მოხსნას ითხოვს.
როგორც მან "ბიზნესპარტნიორთან" განაცხადა, დღეს არსებული რეგულაციები ვირუსს ვერ აჩერებს და მას მხოლოდ ფორმალური ხასიათი აქვს.
კერძოდ, შოთა ბურჯანაძე ითხოვს, რომ რესტორნებში დაუშვან ქორწილები და სხვა ღონისძიებები.
"რეგულაციები უნდა გაუქმდეს, რადგან ის ვირუსს ვერ აკავებს. დღეს არსებული რეგულაციები პრევენციას კი არ ახდენს, უბრალოდ ფურცელზე დაწერილი ფორმალობაა, რაც ეკონომიკის განვითარებას უშლის ხელს.
დღეს რესტორნებში აკრძალულია ივენთები, ღონისძიებები, ქორწილები, რაც, ციფრებში რომ დავთვალოთ, მთელი ბრუნვის 50%-ს წარმოადგენს. ეს შესაძლებლობა, რაც ამ სფეროს გააჩნია, რომელიც ასევე საზოგადოების დაკვეთა და მოთხოვნილებაა, დამუხრუჭებულია", - განაცხადა შოთა ბურჯანაძემ.
