ასოციაცია: ელექტრონული რეცეპტი წამლების ხარჯებისა და მოხმარების ანალიზის საშუალებას იძლევა
მარტიდან საქართველოში მედიკამენტების ელექტრონული რეცეპტების სისტემა ამოქმედდება.
ფარმაცევტული კომპანიების წარმომადგენელთა ასოციაციის აღმასრულებელი დირექტორი, ირაკლი მარგველაშვილი "ბიზნესპარტნიორთან" აცხადებს, რომ ეს პროცესი დიდი ხანია მიმდინარეობს, ტექნიკურადაც მზად იყო, თუმცა შეფერხება იყო გადაწყვეტილების მიღების პროცესში.
"ელექტრონული რეცეპტი ერთ–ერთი ძირითადი კომპონენტია მედიკამენტების და მისი ხარჯების მონიტორინგისთვის. ეს არის აუცილებელი კომპონენტი, რომლის გარეშეც შეუძლებელია საერთოდ სისტემის გაუმჯობესებაზე, ფასების დაზოგვასა და რაციონალურ მოხმარებაზე საუბარი. ასევე, ელექტრონული რეცეპტი აუცილებელია, იმისათვის, რომ მონაცემთა ბაზის მიხედვით ვიცოდეთ რა წამლები ინიშნება საქართველოში, რომელი კლინიკა რას იყენებს და ამის შემდეგ სამინისტროს ექნება ანალიზის საშუალება, დაადგინოს სად იხარჯება ბევრი ფული და რა არის სისტემის სუსტი წერტილი," – აღნიშნავს მარგველაშვილი.
მისივე თქმით, უნდა ამოქმედდეს ის წესები, რაც 2016 წელს მინისტრის ბრძანებაში იქნა გაწერილი, რომელიც ბევრი ქვეყნის გამოცდილების შესწავლის შემდეგ შემუშავდა. ამასთან, მნიშვნელოვანია, რომ ელექტრონულ რეცეპტში იწერებოდეს, როგორც არასავაჭრო დასახელების მედიკამენტები, ასევე ბრენდული.
შეგახსენებთ, რომ პრემიერმა ელექტრონული რეცეპტების სისტემის ამოქმედება მარტისთვის დააანონსა. ირაკლი ღარიბაშვილმა აღნიშნა, რომ პროცესი დაწყებულია, მათ შორის საკანონმდებლო ცვლილებებზე.
