აგრო ექსპორტის განვითარების მიზნით, კომპანიებმა კენკრისა და ხილ-ბოსტნის ჯანსაღ კონდიციაში შენახვაზე იმსჯელეს
საქართველოს ბანკი აგრომიმართულების პროექტების მხარდაჭერას აქტიურ რეჟიმში აგრძელებს. ამ მიზნით, ბანკის პარტნიორობით, 29-30 ნოემბერს, სასტუმრო შერატონში „ცივი ჯაჭვის“ რეგიონული კონფერენცია გაიმართა. ღონისძიებას USAID სოფლის მეურნეობის პროგრამა, სურსათისა და ლოგისტიკის მსოფლიო ორგანიზაციასთან (WFLO) და საქართველოს სამაცივრე მეურნეობების და ლოგისტიკის ასოციაციასთან (GCSLA) ერთად ახორციელებდა.
ღონისძიება აგრო ექსპორტის მიმართულების განვითარების შესაძლებლობებს შეეხო. მომხსენებლები სწორად მოყვანილი კენკრის და ხილ-ბოსტნის ჯანსაღ კონდიციაში შენახვის, ტრანსპორტირებისა და ექსპორტზე გატანის საკითხებზე მსჯელობდნენ. კონფერენციაზე 5 ძირითადი თემა განიხილეს:
- ხილისა და ბოსტნეულის ხარისხის სტანდარტები - აუცილებელი ნაბიჯი ცივი ჯაჭვის განვითარებისთვის;
- ცივი ჯაჭვის რგოლები - მონაწილეების კოოპერაციის მოდელები;
- ცივი ჯაჭვის განვითარებაში შესაბამისი ასოციაციების როლი;
- მუდმივად განახლებადი მონაცემთა ბაზების მნიშვნელობა სექტორისთვის;
- საექსპორტო ბაზის დივერსიფიკაციის შესაძლებლობები.
კონფერენციაში მონაწილეობას იღებდნენ „ცივ ჯაჭვში“ ჩართული კომპანიები და ორგანიზაციები საქართველოდან და აზერბაიჯანიდან. ღია დისკუსიების ფორმატმა „ცივი ჯაჭვის“ მონაწილეებს შესაძლებლობა მისცა, გაეზიარებინათ ერთმანეთისთვის გამოცდილება.
ღონისძიებას 100-მდე ორგანიზაცია და კერძო პირი დაესწრო. ესენი იყვნენ: საქართველოს გარემოს დაცვისა და სოფლის მეურნეობის სამინისტრო, აშშ საერთაშორისო განვითარების სააგენტო, USAID სოფლის მეურნეობის პროგრამის ბენეფიციარი სამაცივრე მეურნეობის წარმომადგენლები; ექსპორტიორები; ასოციაციები; სოფლის განვითარების სააგენტო და საცალო ქსელის ობიექტების წარმომადგენლები.
ცნობისთვის, „ცივი ჯაჭვი“ ლოგისტიკური ზომების კომპლექსია, რომელიც უზრუნველყოფს მუდმივ ტემპერატურასა და სხვა პარამეტრებს, რომლებიც აუცილებელია პროდუქტის სწორად შენახვისთვის და მისი გადაადგილებისთვის წარმოებიდან მომხმარებლამდე.
