10 ათასამდე ხის მოჭრის ნაცვლად, მაკულატურა გვაქვს შეგროვილი და გადამუშავებული - "მწვანე საჩუქარი"
„გარემოზე ზრუნვა ყველასთვის ხელმისაწვდომი რომ გავხადოთ, მაკულატურას ვაგროვებთ, მისი გადამუშავებით მიღებული ქაღალდისაგან კი სხვადასხვა ეკო-დამზოგავ პროდუქტს ვქმნით“, - ამის შესახებ „ბიზნესპარტნიორს“ სოციალური საწარმო „მწვანე საჩუქარის“ დამფუძნებელმა დაჩი ჯანელიძემ განუცხადა.
მისი თქმით, წარმოებული პროდუქტების სია საკმაოდ დიდია. „ამ გზით ვცდილობთ, ნარჩენების დახარისხება და გადამუშავება წავახლისოთ. ამას წინათ, დავთვლეთ და 10 ათასამდე ხის მოჭრის ნაცვლად, მაკულატურა გვაქვს შეგროვილი და გადამუშავებული“,- აღნიშნა დაჩი ჯანელიძემ.
მისივე ინფორმაციით, ქაღალდისგან კონკრეტული ნივთის მიღებამდე, საკმაოდ რთულ გზას გადიან. მთავარი დაბრკოლება ეკო-მეგობრული ნივთების მიმართ ცნობადობის სიმცირე და მაკულატურის შეგროვების პროცესია. ადგილობრივ ბაზარზე, რთულია უკვე გადამუშავებული ქაღალდის მოძიებაც, ამიტომ, „მწვანე საჩუქრის“ დამფუძნებელი აპირებს, საკუთარი პატარა საწარმო შექმნას, სადაც ქაღალდს თავადვე გადაამუშავებს და თუ ახლა, მის მიერ წარმოებულ პროდუქტს მხოლოდ კონკრეტული კომპანიები, ან ორგანიზაციები ყიდულობენ, ის ქაღალდის ეკომეგობრულ ნივთებს საცალო ქსელშიც შეიტანს.
ცნობისთვის, „მწვანე საჩუქარი“ პირველი გარემოსდაცვითი სოციალური საწარმოა საქართველოში, რომელიც ამჟამად თვეში 5 ტონამდე მაკულატურას აგროვებს და მისგან ეკო-დამზოგავ კონვერტებს, ქაღალდის ჩანთებს, ბლოკნოტებს და სხვა ნივთებს ქმნის.
სოციალური საწარმო გეგმავს, შეგროვებული მაკულატურის რაოდენობა 10 ტონამდე გაზარდოს, შედეგად პროდუქტების რაოდენობაც გაიზრდება.
