1 პასკის ფასი 130 ლარია, 2 პასკა - ₾290 ღირს -"ჩირჩხელას" პასკებზე მოთხოვნა მზარდია
კომპანია „ჩირჩხელას“ მაღალფასიან პასკებზე მოთხოვნა წინა წლებთან შედარებით გაზრდილია. ამის შესახებ „ბიზნესპარტნიორთან“ კომპანიის აღმასრულებელმა დირექტორმა, ირმა კვაჭანტირაძემ განაცხადა.
მისი ინფორმაციით, გარდა სხვადასხვა ჩირეულობისა, კომპანიამ უკვე მესამე წელია პასკების წარმოება დაიწყო. როგორც კვაჭანტირაძე აღნიშნავს, ამ ეტაპზე პასკებზე შეკვეთები უკვე გააქტიურებულია.
„ჩირჩხელამ“ სულ რამდენიმე დღის წინ სოციალურ ქსელში ინფორმაცია გამოაქვეყნა, სადაც განმარტებულია, რომ ერთი პასკის ფასი 130 ლარია, ხოლო 2 პასკა 290 ლარი ღირს. კითხვაზე, რატომ ღირს 2 პასკა 260 ლარის ნაცვლად 290 ლარი, კვაჭანტირაძე აცხადებს,რომ ეს კომპანიის მარკეტინგული სტრატეგიის ნაწილია.
„ჩვენ მაქსიმალურად ვცდილობთ ყველა მარკეტინგული აქტივობა და კომუნიკაცია გამოვიყენოთ პროდუქციის პოპულარიზაციისთვის. პარტიზანული მარკეტინგი მიღებული ფორმაა, რომელსაც ყველა დიდი ბრენდი მიმართავს,“-აცხადებს კვაჭანტირაძე.
მისი თქმით, რამდენიმე დღეში პროდუქციას ფასი დააკლდება, თუმცა, მსგავსი აქტივობები ადამიანებში პოზიტივს იწვევს.
როგორც კომპანიის აღმასრულებელი დირექტორი აღნიშნავს, მათი მომხმარებლები ჩვეულებრივი, რიგითი ადამიანები არიან.
სააღდგომოდ პროდუქციის ქსელურ მარტკეტებში შეტანა არ იგეგმება, რადგან, როგორც კომპანიის აღმასრულებელი დირექტორი აღნიშნავს, იქ ისედაც დიდი არჩევანი იქნება და მათი პროდუქცია დაიკარგება. რეალიზაცია ამ ეტაპზე ძირითადად ონლაინ გაყიდვების საშუალებით ხდება, თუმცა მომხმარებელს პასკის შეძენა ადგილზე მისვლითაც შეუძლიათ.
ცნობისთვის, „ჩირჩხელა“ ოჯახური ბიზნესია, რომელიც ბაზარზე 6 წელია ოპერირებს და თბილისში (ვაკე) ერთ მაღაზიას ფლობს.
კომპანია მომხმარებელს სხვადასხვა სახის ქართული ნუგბარის ნაირსახეობასა და პასკების ასორტიმენტს სთავაზობს.
