სასტუმრო კომპლექსი "ლოპოტა" გაფართოებას გეგმავს

სასატუმრო კომპლექსი „ლოპოტა“ ისევ გაფართოებას გეგმავს. კომპანია 2019 წლის ფინანსურ ანგარიშში წერს, რომ განვითარება გულისხმობს დამატებით 135 სასტუმრო ნომრის, ბოულინგის, ლუდსახარშის, საბილიარდოს, თევზის რესტორნის, ჯაზ კლუბის, აკვაპარკის და საერთაშორისო სტანდარტებით მოწყობილ ჩოგბურთის 6 მოედნისა და კალათბურთის მოედნის აშენებას.

განვითარების გეგმის ფარგლებში 2019 წელს, სასტუმრო კომპლექსს დაემატა ღვინის შატო, პროექტის სრულმა საინვესტიციო ღირებულებამ 6 მლნ დოლარი შეადგინა. 

2019 წელს „ლოპოტამ“ 21.55 მლნ ლარის შემოსავალი მიიღო, 2018 წელს - 15.4 მლნ. საოპერაციო მოგება 2.86 მლნ იყო, თუმცა წლიური ზარალი დიდი ფინანასური ხარჯის გამო 2.8 მლნ-ს შეადგენდა. სასტუმრო ოთახების საშუალო დატვირთულობა 59.9% იყო.

ბუნებრივი ტბის გარშემო გაშენებული “ლოპოტა სპა რეზორტი” დღესდღეობით 186 ოთახს აერთიანებს, რომელიც ტბის გარშემო 14 შენობაშია განაწილებული. რეზორტის უზარმაზარი დახურული ტერიტორია მოიცავს ღია და დახურულ აუზებს, საუნასა და ჯაკუზის, ფიტნეს ცენტრს, სხვადასხვა სახის რესტორნებს, ღია ბუნგალოებს და ბარებს, კალათბურთის და ხელბურთის კორტებს, მინი გოლფის მოედანს, სათევზაო სივრცეს და საჯინიბოს, ლოპოტას ტყის სპას, შატო ბუერას და არაერთ სხვა გასართობ საშუალებას როგორც ზრდასრულებისთვის, ასევე ბავშვებისთვის.