მგზავრთნაკადის აღდგენის დინამიკით თბილისს ბათუმის საერთაშორისო აეროპორტი უსწრებს
მგზავრთნაკადის აღდგენის დინამიკა ბათუმის საერთაშორისო აეროპორტში უფრო პოზიტიურია, ვიდრე თბილისში.
როგორც „ბიზნესპარტნიორს“ „ტავ ჯორჯიას“ გენერალურმა მენეჯერმა თეა ზაქარაძემ განუცხადა, 8 თვეში, 2019 წელთან შედარებით, ბათუმის საერთაშორისო აეროპორტმა მგზავრთა 75% დაიბრუნა, ხოლო თბილისის საერთაშორისო აეროპორტში ზრდა მხოლოდ 35%-ია.
„მოგეხსენებათ, ბათუმი სეზონური აეროპორტია და შესაბამისად, იქ უფრო კარგი დინამიკაა, უკეთესად განვითარდა ზაფხულში მგზავრთნაკადის დინამიკა. რაც შეეხება თბილისს, რა თქმა უნდა, არ ვართ კმაყოფილები. ვფიქრობთ, რომ მიმდინარე წელს აქ მილიონ ნახევარი მგზავრით დავასრულებთ, ხოლო ბათუმში - 406 ათასი მგზავრით. ეს 2019 წლის მაჩვენებლებთან მიახლოებული ის ციფრები არ არის, თუმცა, ვმუშაობთ და ვაკეთებთ ყველაფერს რათა დინამიკა გავაუმჯობესოთ“ - აღნიშნა თეა ზაქარაძემ.
