ფრენების გადავადებას მოულოდნელი ცვლილებები არ გამოუწვევია - ლოპოტა სპა რეზორტი
„ლოპოტა სპა რეზორტის“ გენერალური მენეჯერის, მაკა ღლიღვაშვილის განცხადებით, ამ ეტაპზე ობიექტი სრულად გადართულია ადგილობრივი ბაზრის პოტენციალის ათვისებაზე.
რაც შეეხება რეგულარული ფრენების 1 სექტემბრამდე გადავადებას, ღლიღვაშვილი აღნიშნავს, რომ ქართველები ყოველთვის შეადგენდნენ „ლოპოტა სპა რეზორტის“ დამსვენებლების უმრავლესობას, წელს კი უკვე ძირითად სეგმენტად იქცნენ.
როგორც ღლიღვაშვილი განმარტავს, წლის მეორე ნახევრის ჯავშნები ჯერ კიდევ გაზაფხულზე გაუქმდა, ასე რომ, ამჯერად ფრენების გადავადებას განსაკუთრებულად მოულოდნელი ცვლილებები არ გამოუწვევია.
რაც შეეხება იმას, თუ რა მოლოდინები არსებობს მიმდინარე წლის ზაფხულის სეზონთან დაკავშირებით, ღლიღვაშვილი აცხადებს, რომ ზაფხულის 2 თვე, პრაქტიკულად, მიიწურა, თუმცა, კომპანიამ გამომდინარე გასულ წლებთან შედარებით დაბალი დატვირთულობისა, სწრაფად მოახერხა ახალ რეალობაზე გადაწყობა, შესაბამისად, დაისახა ფინანსური მოლოდინებიც.
„ამჟამად კომპანია მასპინძლობს როგორც ინდივიდუალურ დამსვენებლებს, ასევე კორპორატიულ ჯგუფებს,“ - აცხადებს ღლიღვაშვილი.
მისივე ინფორმაციით, „ლოპოტა სპა რეზორტი“ განვითარების პროექტებზე აქტიურად მუშაობს, რომლის დეტალებსაც ამ ეტაპზე არ აკონკრეტებს.
