ევროპის 42 ქვეყანას შორის, საქართველოში ყველაზე ნაკლები ფრენა სრულდება

ევროპის 42 ქვეყანას შორის, საქართველოში (14 აგვისტოს მდგომარეობით) ყველაზე ნაკლები ფრენა სრულდება.

avianews.ge აქვეყნებს Eurocontrol-ის მონაცემებს, რომლის მიხედვითაც საქართველოში 2-კვირიან პერიოდში (31 ივლისიდან 14 აგვისტომდე) ფრენების რაოდენობა 15%-ით გაიზარდა და დღიურად 15-ს მიაღწია (მოფრენა-გაფრენა). სომხეთში მაჩვენებელი 143%-ით არის გაზრდილი - დღიურ 17 ფრენამდე, მოლდოვაში 36%-ით – 34 ფრენამდე.

14 აგვისტოს მდგომარეობით, ევროპის ქვეყნებს შორის ყველაზე მეტი ფრენა დიდ ბრიტანეთში შესრულდა (3019 ფრენა, 31 ივლისთან შედარებით +19% ), მეორე ადგილზე გერმანიაა (3017 ფრენა, +5%), მესამეზე კი საფრანგეთია (2842, უცვლელია).

როგორც ცნობილია, საქართველოს ცა საერთაშორისო რეგულარული ფრენებისთვის 1-ელ ოქტომბრამდე დახურულია. სამოქალაქო ავიაციის სააგენტომ მორიგი NOTAM-ი გამოსცა, რომლის მიხედვითაც რეგულარული საჰაერო მიმოსვლა შეზღუდულია 30 სექტემბრის ჩათვლით. არსებობს მხოლოდ გამონაკლისები და თბილისის მიმართულებით რეგულარული რეისების განხორციელება დაშვებულია მიუნხენიდან, პარიზიდან და რიგადან. 

რეგულარული საერთაშორისო ფრენების გახსნის უკვე მეექვსე გადავადებას სოციალურ ქსელში დიდი პროტესტი მოყვა.