2021 წელს "ოტიას ეზოში" საოჯახო სასტუმრო გაიხსნება
ოტია იოსელიანი წყალტუბოში ოჯახურ მეურნეობა „ოტიას ეზოში" საოჯახო სასტუმროს გახსნის. „ბიზნესპარტნიორთან“ მეურნეობის დამფუძნებელი ოტია იოსელიანი ამბობს, რომ 3-4 ადგილიან გესთჰაუსში პირველ სტუმარს მომავალი წლის ზაფხულში მიიღებს.
ოტია იოსელიანის თქმით, ამ დროისთვის სასტუმროს მშენებლობა დასრულებულია, დარჩენილია მხოლოდ სარემონტო სამუშაოები.
მისი ინფორმაციით, სახლ-მუზეუმის პირველ სართულზე მარანია განთავსებული, სადაც სხვადასხვა სახის ღვინის დაგემოვნებაა შესაძლებელი.
„ეს ოჯახის ღვინოა. ამ ეტაპზე ვამზადებთ 4 დასახელების ღვინოს (ჩხავერი,ოცხანური საფერე, ცოლიკაური, ოჯალეში), თუმცა მათი რაოდენობა მომავალ წელს 3-მდე შემცირდება. მიზეზი ის არის, რომ მათ წარმოებას ფიზიკურად ვერ აუდივართ “-აცხადებს ოტია იოსელიანი.
"ოტიას ეზო" 2015 წელს ქართველი მწერლის ოტია იოსელიანის სახლ-მუზეუმში მისი ოჯახის წევრების მიერ დაფუძნდა. ამჟამად მეურნეობაში - ციტრუსი, სიმინდის ფქვილი, აჯიკა, სვანური მარილი, ლობიო, თაფლი და სხვა პროდუქტები აქვთ. როგორც ოტია იოსელიანი აცხადებს, ის პროფესიით არქიტექტორია, თუმცა მეურნეობა არქიტექტურასთან ერთად მისი ერთ-ერთი მთავარი საქმეა.
