Sweeft Digital-ი ციფრული მარკეტინგის მიმართულებით საერთაშორისო ბაზრების ათვისებას გეგმავს

Sweeft Digital-ი უახლოეს მომავალში ციფრული მარკეტინგის მიმართულებით საერთაშორისო ბაზრების ათვისებას გეგმავს.

როგორც კომპანიის დამფუძნებელი ვაკო თურნავა "ბიზნესპარტნიორთან" აცხადებს, გაფართოება უკვე კომპანია Elliot-თან ერთად გაგრძელდება. "ვაპირებთ ისეთი მიმართულებების განვითარებას როგორიცაა: ციფრული მარკეტინგი, კრეატივი, მონაცემთა კონფიგურაცია, კამპანიების ოპტიმიზაცია და სხვა," – ამბობს ვაკო თურნავა.

შეგახსენებთ, რომ Sweeft Digital–მა ციფრული მარკეტინგის ქართული სააგენტო Elliot-ი ახლახანს შეიძინა.

Elliot-ი უკვე დღეიდან Making Science-ის ქოლგის ქვეშ მყოფ Sweeft Digital-თან გააგრძელებს ოპერირებას, რომელიც საერთაშორისო პროგრამული უზრუნველყოფის განვითარების ერთ-ერთი უმსხვილესი ქართული კომპანიაა.

"მზად ვართ უფრო თავისუფლად შევცუროთ დიჯითალ სამყაროს უსაზღვრო შესაძლებლობებში," - ასე ეხმიანება Elliot-ი ახალ გარიგებას.

Sweeft Digital-ი კომპანია Elliot-ის შეძენამდე მომხმარებლებს პროგრამული უზრუნველყოფის მიმართულებით ისეთ სერვისებს სთავაზობდა, როგორიცაა:

აპლიკაციების შექმნა, ვებ დეველოპმენტი, ავტომატიზაციის პროგრამები, პროფესიონალი კადრებით უზრუნველყოფა და ა.შ. თუმცა, დღეიდან კომპანია ქართულ და საერთაშორისო ბაზრებს ისეთ სერვისებს შესთავაზებს, რომელიც  ციფრული მარკეტინგის ინდუსტრიას ეხება.

ინფორმაციისთვის, 2017 წლიდან Sweeft Digital–ი საერთაშორისო ბრენდებთან თანამშრომლობს, ხოლო 2021 წლიდან ესპანური კომპანია Making Science-ის წევრი გახდა.

Making Science ტექნოლოგიური და ციფრული მარკეტინგის კონსულტანტია, რომელიც სპეციალიზირებულია e-commerce-სა და ციფრულ ტრანსფორმაციაში.