"მედია გეგმის დოკუმენტის არსებობა გარანტიაა იმისა, რომ ბიზნესი ფინანსურ რესურსებს ეფექტურად დახარჯავს"

"ბიზნესპარტნიორმა"  ყოველკვირეული რუბრიკა - "ციფრული პარტნიორი" დაიწყო, სადაც ციფრული მარკეტინგის სწრაფად მზარდ ბაზართან დაკავშირებით არაერთი აქტუალური საკითხის განხილვა და ანალიზი ხდება.

რა სარგებლობა მოაქვს ბიზნესისთვის მედია გეგმის და მედია აუდიტის არსებობას? - აღნიშნულ თემებზე "ბიზნესპარტნიორთან" რუბრიკის სტუმარმა,  ციფრული მარკეტინგის სააგენტო ClipArt-ის ბიზნესის განვითარების მენეჯერმა, თამთა კალანდაძემ ისაუბრა. 

• რა მნიშვნელობა აქვს მედია აუდიტისა და მედია გეგმის არსებობას ბიზნესისთვის?

მედია აუდიტი გვაძლევს შესაძლებლობას, რომ პირველადი ინფორმაცია მოვაგროვით იმ საკომუნიკაციო მედია ველზე, რომელშიც ბიზნესი/ბრენდი მომავალში აპირებს კომუნიკაციის პროცესის წარმართვას. განსაკუთრებით, ისეთ მნიშვნელოვან მახასიათებლებზე, როგორიცაა კონკურენტების ანალიზი, კონკურენტების აქტივობა და ამ კუთხითაც შეგვიძლია ჩვენი საპროგნოზო მოლოდინები თუ ხედვები ჩამოვაყალიბოთ. სწორი მედია გეგმის დოკუმენტის არსებობა გარანტიაა იმისა, რომ ბიზნესი ეფექტურად დახარჯავს ფინანსურ რესურსებს, დაზოგავს დროს და შესაბამისად, ადამიანურ რესურსს და ექნება იმის შესაძლებლობა, რომ სწორად, დროულად, აუდიტორიისთვის შესაბამისი ფორმატით და მათთვის საინტერესო კუთხით მიიტანოს ბრენდმა მისი საკომუნიკაციო მესიჯი თუ გზავნილი სამიზნე აუდიტორიამდე.

• რა კომპონენტებისგან შედგება მედია გეგმა და როგორ უნდა განვსაზღვროთ სწორად არის თუ არა იგი შედგენილი?

მედია გეგმა ბიზნესის კატეგორიისგან, სხვადასხვა ინდუსტრიებიდან გამომდინარე და ა.შ. შესაძლებელია იყოს შედარებით მარტივი, ან ძალიან კომპლექსური, თუმცა ძირეული კომპონენტები მაინც ერთია. ეს პირველ რიგში, არის მედია ამოცანები, რომლებიც უკავშირდება ბიზნესის მარკეტინგულ მიზნებს, შემდეგ შედგება სამიზნე აუდიტორიის ძალიან დეტალური აღწერით. მესამე კომპონენტად შეგვიძლია გამოვყოთ ის კონკრეტული მედია მიქსი და საკომუნიკაციო მედიუმები, რომლებზეც ვაპირებთ კომუნიკაციის პროცესის წარმართვას. მეოთხე და ყველაზე მნიშვნელოვანი არის კონტენტ მარკეტინგის ნაწილი   და ეს შეიძლება იყოს კრეატიული სტრატეგიის აღსრულების ნაწილი.

მეხუთე კომპონენტად შეგვიძლია გამოვყოთ უკვე მედია გეგმის კონკრეტული დრო. შემდეგი კი არის კონკრეტული აღსრულების გეგმა.  ეს არის ძირეული კომპონენტები, რა თქმა უნდა, მათ აქვთ საკმაოდ გრძელი და დეტალური ჩაშლა.

თუნდაც შეფასების ნაწილში დავდივართ ასევე ძალიან დეტალურ მეტრიკებამდე. მაგალითად, თუ რა არის ბიზნესის ბიზნესის ამოცანა. თუ ეს არის პოზიტიური ცნობადობის ამაღლება ბაზარზე - სხვა შეფასების სისტემა გვაქვს, თუ კონკრეტული ჩართულობის წამოღებაა სამიზნე აუდორიიდან, მაშინ სხვა კომპონენტებია. ხოლო, თუ ყველაზე მნიშვნელოვან, ფინანსურ ნაწილს უკავშირდება და გვინდა  კონვერტაციის (გაყიდვების) მაქსიმალური სტიმულირება, აქაც განსხვავებული საზომი ერთეულები გვაქვს.

• საქართველოში არსებული მედიაველი რამდენად მიჰყვება მსოფლიოში არსებულ ტენდენციებს მედიაგანვითარების კუთხით?

გლობალური მასშტაბით ჩვენ ვხვდებით ისეთ შესაძლებლობებს და ისეთ საკომუნიკაციო არხებს, როგორებიცაა მაგ. ნეტფლიქსი, ამაზონ პრაიმი და სხვ. ასევე, გლობალურად განვითარდა სოც. პლატფორმები, რაც ლოკალური ბაზრის წარმომადგენლებს საშუალებას გვაძლევს ამ პლატფორმებზეც ვიყოთ წარმოდგენილი. მაგალითად, შეგვიძლია მოვიყვანოთ ის, რომ ტრადიციული მედიის ერთ-ერთი წარმომადგენელი, როგორიც არის ტელევიზია, დღეს უკვე წარმოდგენილია სხვადასხვა საკომუნიკაციო პლატფორმებზე. ჩვენ უკვე გვაქვს ონლაინ მედია საშუალების ვერსიით  სატელევიზიო პროდუქტების გაცნობის შესაძლებლობა. მათ შორის, თუნდაც საზოგადოებრივი მაუწყებელი, რომელიც რამოდენიმე წელია ძალიან კარგად უწყობს ფეხს სიახლეებს და მომხმარებელს შესთავაზა ციფრული აპლიკაცია - პირდაპირ მობილურით შეუძლია მომხმარებელს ინფორმაციის მიღება.

რაც შეეხება ტემპებს, ჩვენ არ ვართ ძალიან დიდი მასშტაბის მქონე ბაზარი, როგორიც შეიძლება იყოს ამერიკის, ევროპის ან აზიის სხვადასხვა ქვეყნებში, შესაბამისად ის მოთხოვნები, რასაც დიჯითალიზაციის პროცესი მოითხოვს, ამ მხრივ ცოტა ჩამორჩენა გვაქვს, თუმცა,  ვფიქრობ, რომ ზუსტად დიჯითალიზაციის პროცესთან ერთად, კიდევ უფრო დაიხვეწება და ამაღლდება ჩვენი ცოდნა ამ საჭირო საკითხების მიმართ და ტემპიც გაცილებით უფრო მეტად მოიმატებს.

• როგორ გავზომოთ იმუშავა თუ არა ჩვენს მიერ შედგენილმა მედია გეგმამ?

ეს უკვე არის ე.წ. on going პროცესი, ანუ მუდმივ რეჟიმში შეგვიძლია მივაქციოთ ყურადღება იმას, თუ რამდენად თავსებადია მიღებული შედეგები ჩვენს მიერ დაგეგმილ მეტრიკებთან მიმართებაში.  დავუშვათ  ეს ციფრულ საკომუნიკაციო არხებს არ შეეხება, მაშინ არსებობს ტრადიციული მედიის კონკრეტული საზომი ერთეულები და აი ამ მეტრიკებით უნდა გავზომოთ.

ციფრული საკომუნიკაციო კამპანიების და ციფრული მედია  დაგეგმარების დროს ყველაზე დიდი უპირატესობა არის ის, რომ მიღებული შედეგები ნებისმიერ წუთს შეგვიძლია ვაკონტროლოთ. თუ ეს შედეგები არ აკმაყოფილებს ჩვენს მოთხოვნებს, შეგვიძლია დავაოპტიმიზიროთ. ოპტიმიზაციის პროცესი ძალიან მნიშვნელოვანია, რაც საბოლოო ჯამში, გვაძლევს იმის გარანტიას, რომ გაცილებით უფრო ეფექტურად და სწორად დავხარჯოთ ჩვენი ფინანსები და ვაკონტროლოთ მუდმივ რეჟიმში, შესაბამისად, მივიღოთ ზუსტად ის შედეგი, რაც თავიდანვე დაგეგმილი გვქონდა და გავიდეთ ამ ამოცანების შესრულებაზე.