ამბიციური გეგმები გვაქვს – GITA-ს პროგრამის გამარჯვებული SMART FERT 4.0-ი

SMART FERT 4.0-ი ამბიციურ გეგმებზე აცხადებს. სტარტაპი GITA-ს კონკურსის გამარჯვებულია და აგრომიმართულებით მუშაობს.

სტარტაპის დამფუძნებელი ნინო კუნცევა–გაბაშვილის თქმით, ეს არის ბიოტექნოლოგიური  და რევოლუციური პროდუქტი, რომელიც გულისხმობს ახალი თაობის, ნიადაგის მასტრუქტურირებელ „ჭკვიან“ სასუქი-დანამატებს.

„საკმაოდ ამბიციური გეგმები გვაქვს. მოპოვებული გრანტის ფარგლებში ვაპირებთ პროდუქტის ტესტირებას და საბოლოო ფორმულირებას, ასევე ინტელექტუალური საკუთრების დაცვას. ამ ეტაპზე, კონცეფციაზე მუშაობა დასრულებულია, მაგრამ არის ნიუანსები, რომელიც დასამუშავებელია, შესაძლებელია პროდუქტი რამდენიმე მიმართულებით განვითარდეს. პილოტური წარმოების გაკეთებაც გვინდა. მოგებული 100 000 ლარიც მთლიანად ამაზე დაიხარჯება. GITA-ს თანადაფინანსების პროგრამის შერჩევის ეტაპზე დიდ გამოცდილებას იღებს ნებისმიერი აპლიკანტი. ეს შესაძლებლობას გაძლევს დახვეწო პროექტი და უკვე მზა ფორმით წარუდგინო ინვესტორებს,“ – აღნიშნავს ნინო კუნცევა-გაბაშვილი.

მისივე თქმით, კერძო ინვესტიციის რაოდენობა ათეულობით ათასი ლარია. პროექტის სრულად განვითარებისთვის კი მილიონობით ლარია საჭირო.

რამდენიმე წელი მხოლოდ SMART FERT 4.0–ის ტესტირებას დასჭირდება, როგორც საქართველოში ასევე სხვა ქვეყნებში.