ვაზის ჯიშების მონაცემთა ბაზის სრულყოფაში საქართველოს საფრანგეთი დაეხმარება
ვაზის ჯიშების მონაცემთა ბაზის სრულყოფაში საქართველოს ფრანგული მხარე დაეხმარება.
სოფლის მეურნეობის სამეცნიერო-კვლევითი ცენტრის დირექტორი ლევან უჯმაჯურიძე საფრანგეთის სოფლის მეურნეობის, სურსათისა და გარემოს ეროვნული ინსტიტუტის (INRAE) ვაზის გენეტიკური რესურსების კოლექციის დირექტორს, სესილი მარშალს შეხვდა.
მხარეებმა ერთად დაათვალიერეს ჯიღაურას მრავალწლოვანი კლუტურების საცდელ-სადემონტრაციო ბაზაზე ვაზის კოლექციები და ლაბორატორიებში მიმდინარე სამუშაოები.
ისაუბრეს სარგავი მასალის სერტიფიცირების პროცესზეც, რომელსაც სახელმწიფო 2016 წლიდან ახორციელებს. მაღალი კატეგორიის საბაზისო სადედე ნარგაობის მოწყობის მიზნით, ჯიღაურას ბაზაზე 2021 წელს, გაეროს სურსათისა და სოფლის მეურნეობის ორგანიზაციის (FAO) ფინანსური მხარდაჭერით ეკრანული სათბურები მოეწყო, საიდანაც საკვირტე და საძირე მასალა სანერგე მეურნეობებში სადედეების მოსაწყობად გავრცელდება.
აღსანიშნავია, რომ INRAE-ს დაქვემდებარებაში მყოფ ვასალ მონპელიეს ვაზის ბიოლოგიური რესურების ცენტრში, 55 ქვეყნიდან 5000 -მდე ნიმუშია თავმოყრილი; აქედან კულტურული ვაზის 2600-მდე ჯიში და ველური ვაზის 400-მდე ფორმაა. კოლექციაში ასევე დაცულია 400 საძირე და ვიტისის გვარის სხვადასხვა სახეობა.
სოფლის მეურნეობის სამეცნიერო-კვლევითმა ცენტრმა საფრანგეთის სოფლის მეურნეობის, სურსათისა და გარემოს ეროვნული ინსტიტუტთან (INRAE) თანამშრომლობის მემორანდუმს 2019 წელს მოაწერა ხელი. მემორანდუმი ერთობლივი პროექტების შემუშავებას და უწყებების დაქვემდებარებაში არსებულ ბაზებზე გაშენებული ვაზის ჯიშების მრავალფეროვნების შესწავლას, სპეციალისტების,ინფორმაციის გაცვლას და ერთობლივ სამეცნიერო-კვლევითი სამუშაოების ჩატარებას გულისხმობს.
