სირაქლემების ფერმა მარტვილში - ობიექტი ტურისტული დანიშნულებით განვითარებას გეგმავს
მარტვილში, ერთ-ერთ ფერმაში ფრინველთა უჩვეულო სახეობები მოაშენეს - სირაქლემები, ფარშევანგები, ხოხბები და დეკორატიული ქათმები ტრადიციული სახეობების - ძროხებისა და ღორების გვერდით თანაარსებობენ.
როგორც „ბიზნესპარტნიორს“ ფერმის თანადამფუძნებელმა გიორგი ასრატიანმა განუცხადა, ფერმის შემქნის იდეა პანდემიის დროს გაჩნდა.
„როდესაც პანდემია დაიწყო და ზოგიერთი პროდუქტის დეფიციტი გაჩნდა ბაზარზე, ვიფიქრეთ, რომ ძროხები შეგვეძინა და რძე, ყველი და სხვა პროდუქტები მიგვეწოდებინა ბაზრისთვის. შევიძინეთ ჰოლშტაინის ჯიშის ძროხები და ღორები, რომელთაგანაც უქოლესტორინო, დიეტური ხორცი მიიღება. პარალელურად კი, ევროპიდან სხვადასხვა ფრინველის კვერცხი ჩამოვიტანეთ, შევიძინეთ ინკუბატორები და შედეგად, ყველა ფრინველი საქართველოში გამოიჩეკა,“ - აცხადებს გიორგი ასრატიანი „ბიზნესპარტნიორთან“.
მისივე ინფორმაცით, სირაქლემებს ძირითადად, დეკორატიული დანიშნულებით ყიდულობენ. მოთხოვნა დიდი არაა, თუმცა, წყვილი ზრდასრული სირაქლემას ფასი $3 ათასიდან $5 ათასამდეა.
გარდა დეკორატიული ფინველებისა, ფერმა ტურისტული პროდუქტების შეთავაზებასა და განვითარებას გეგმავს.
„მარტვილის მუნიციპალიტეტში, სოფელ ნახუნაოში გვაქვს რანჩოს ტიპის სახლი და სივრცე. ამ დროისთვის ვცდილობთ, რომ ეკოტურისტულად მოვემზადოთ და ჩვენს ტერიტორიაზე სარესტორნო ობიექტი და კოტეჯები განვათავსოთ“ - ამბობს ფერმის დამფუძნებელი.
