შალვა ხეცურიანი: ტვინების ყიდვა გვჭირდება, ეს ღვინის სამშობლოს სტატუსს არ წაგვართმევს
სომელიეთა ასოციაციის პრეზიდენტი ღვინის სექტორში საქართველოს წინაშე არსებულ გამოწვევებზე საუბრობს. შალვა ხეცუარიანი მიიჩნევს, რომ ერთ-ერთი ყველაზე მნიშვნელოვანი პრობლემა განათლებაა.
ასოციაციაში ამბობენ, რომ ქვეყანას ღვინის მიმართულებით ახალ საფეხურზე სჭირდება ასვლა, რისთვისაც პირველ რიგში სწორედ მეღვინეებისა და მევენახეების განათლების დონის ამაღლებაა საჭირო.
„თავი და თავი ყველაფრის არის განათლება, სადაც მძიმე მდგომარეობაა. ჩვენ უნდა ვიყიდოთ ტვინები ამ მიმართულების განსავითარებლად და ეს საერთოდ არ გვართმევს ქართველობას და მით უმეტეს ღვინის სამშობლოს სტატუსს. განათლების ყიდვა არ ნიშნავს ვინმესგან რაიმეს გადმოღებას, მაგრამ უფრო გამოცდილი ქვეყნებისგან საუკეთესო პრაქტიკის გაზიარება გაგვაძლიერებს. ჩვენ ვერ განვაცვიფრეფთ მსოფლიოს დიდი მოცულობის ღვინის წარმოებით, აქცენტი სხვა დეტალებზე უნდა გაკეთდეს,“ - შალვა ხეცურიანი - საქართველოს სომელიეთა ასოციაციის პრეზიდენტი
პრობლემების მოგვარების ერთ-ერთ გზას სომელიეთა ასოციაციაში უცხოელ ექსპერტთა ჯგუფის დაქირავებაში ხედავენ. გაერთიანებაში განმარტავენ, ცოდნის შემოსატანად და საჭირო სტრატეგიის შესამუშავებლად ქვეყანამ უცხოელი სპეციალისტებისგან გამოცდილების გასაზიარებლად აქტიური კამპანია უნდა დაიწყოს.
