შალვა ხეცურიანი: "ღვინის სამშობლოს" ვერ დალევ, ღვინოს გემო უნდა ჰქონდეს
„საქართველოს სომელიეთა ასოციაციის“ პრეზიდენტი განმარტავს, რომ მეღვინეობის სექტორში არაერთი პრობლემაა, რომლის მოგვარებაც აუცილებელია. შალვა ხეცურიანის თქმით, ყველაზე მნიშვნელოვანი გამოწვევა ცოდნის დეფიციტია.
„ნიადაგის, ადგილის ნახვა, სწორად საძირის შერჩევა, ვენახის გაშენება, ელემენტარული გასხვლა - ეს არის ცოდნა, რომელიც უნდა იყიდო, „ღვინის სამშობლოს“ ვერ დალევ, ღვინოს გემო უნდა ქონდეს. დღეს ჩვენ ყველა მიმართულებაში პრობლემა გვაქვს. ამ პრობლემებს კი სხვების გამოცდილების გაზიარებით სჭირდება აღმოფხვრა. მაგალითად, ჩვენს კომპანიას ყავს ფრანგი კონსულტანტები. 12 500 ევრო გვიჯდება ერთ დღე მათი ვიზიტი. ეს არის ფასი, რომელსაც ცოდნის იმპორტში ვიხდით,“-განმარტა შალვა ხეცურიანმა.
მისივე თქმით, ცოდნისა და გამოცდილების ნაკლებობა საქართველოში განსაკუთრებით მევენახეობის მიმართულებით არის შესამჩნევი.
„ჩვენ გვყავს რამდენიმე საერთაშორისო მნიშვნელობის მეღვინე. მაგრამ, მევენახეობაში ძალიან გვიჭირს. ეს არის დარგი, რომელიც ფაქტიურად ჩავარდნილია. კატასტროფული სიტუაციაა და აქ არის ზუსტად საჭირო განათლებისა და ცოდნის შემოტანა. ღვინო იქმნება ვენახში. სამწუხაროდ, ამბიციები უფრო მეტი გვაქვს ვიდრე რაღაცის კეთების რეალური სურვილი. თუმცა გვაქვს შესაძლებლობები, რასაც რეალურად გვაძლევს ადგილმდებარეობა. ადგილები არის ჩვენი სიმდიდრე, მაგრამ ჩვენ გვჭირდება ცოდნა რომ შევძლოთ ამ ტერიტორიებზე სხვადასხვა კლასის ღვინის მიღება. აუცილებელი არ არის რომ ყველამ აწარმოოს მაინცდამაინც 20 და 30 ევროს ღირებულების ღვინო. შეიძლება თუნდაც ორევროიანი იყოს და ეს ნორმალურია, უბრალოდ ყველა კლასს თავისი თამაშის წესები სჭირდება,“ - განაცხადა შალვა ხეცურიანმა გადაცემა „ბიზნესპარტნიორის ოთხეულში“.
