სამაცივრე მეურნეობის მოწყობაზე კოოპერატივები 80%-იან თანადაფინანსებას მიიღებენ

სასოფლო-სამეურნეო კოოპერატივების მხარდასაჭერად კიდევ ერთი პროგრამა განხორციელდება. 

მთავრობის დღევანდელი გადაწყვეტილებით, "სასოფლო-სამეურნეო კოოპერატივების შემნახველი საწარმოების თანადაფინანსების" სახელმწიფო პროგრამის პირობებით, სოფლის განვითარების სააგენტო უზრუნველყოფს შემნახველი და სამაცივრე ინფრასტრუქტურის თანადაფინანსებას, რომელიც გათვალისწინებული იქნება ბოსტნეულის შესანახად. 

500 ტონა ტევადობის შემნახველი საწარმოს თანადაფინანსების მოცულობა შეადგენს, მისი ჯამური ღირებულების არაუმეტეს 80%-ს და არაუმეტეს 450 000 ლარს. 

"ფერმერები, რომლებიც ბოსტნეულის კულტურის წარმოებას ახორციელებენ, შეუძლიათ გაერთიანდნენ, შექმნან კოოპერატივი. თუ ისინი მთავრობის კონკრეტული დადგენილებით გაწერილ პირობებს დააკმაყოფილებენ, ისინი ბოსტნეულის შემნახველი მეურნეობის მოწყობისთვის სახელმწიფოსგან მიიღებენ თანადაფინანსებას გრანტის სახით მთლიანი ღირებულების 80%-ის ოდენობით. 

რა თქმა უნდა ეს ყველაფერი მიმართული იქითკენ, რომ ჩვენ ფერმერებს შევუქმნათ შესაძლებლობა, ყველა სტანდარტის დაცვით, შეინახონ მათ მიერ მოყვანილი პროდუქტი და მიაწოდონ ისინი ბაზარს პერიოდულად, იმ პირობებით, რომელიც მათთვის იქნება უფრო მეტი სარგებლის მომტანი", - განაცხადა სოფლის მეურნეობის მინისტრმა ოთარ შამუგიამ.