საქართველოში ზეთისხილის კულტურის განვითარებაზე საერთაშორისო საბჭო იზრუნებს

ზეთისხილის საერთაშორისო საბჭომ, რომელიც   მსოფლიოში ზეთისხილის მოსავლის 97%-ს და ტრეიდინგის 74%-ს აკონტროლებს, საქართველოში ზეთისხილის კულტურის და ზოგადად, დარგის განვითარება თავის თავზე აიღო.

როგორც  ზეთისხილის საერთაშორისო საბჭოს პრეზიდენტი გიორგი სვანიძე „ბიზნესპარტნიორთან“ აცხადებს, მნიშვნელოვანია, რომ ამას საბჭო დააფინანსებს. მათ შორის, ორგანიზაციის საგრანტო პროგრამის ფარგლებში საქართველოში გაკეთდება საერთაშორისო ლაბორატორია, რომელიც მსოფლიო მნიშვნელობის სერთიფიკატებს გასცემს.

სვანიძის ინფორმაციით, პროგრამის ფარგლებში საბჭო გამოაგზავნის აგრონომებს.

რა მოცულობის იქნება საგრანტო პროგრამა და საქართველოში ზეთისხილის  კულტურის განვითარებაში რა ფინანსური რესურსი დაიხარჯება, სვანიძე ვერ აკონკრეტებს, თუმცა, აცხადებს, რომ პროგრამა მინიმუმ 10 წლიანი იქნება.

„ქართული ზეთისხილის“ დამფუძნებელი და  ზეთისხილის საერთაშორისო საბჭოს პრეზიდინეტი თვლის, რომ ზეთისხილის ინდუსტრიას იმდენად მიმზიდველი მახასიათებლები აქვს, რომ ის სავარაუდოდ უკან ჩამოიტოვებს საქართველოსთვის ისეთ ტრადიციულ საექსპორტო პროდუქტებს, როგორიცაა თხილი და ყურძენი.

ზეთისხილის საერთაშორისო საბჭო არის გაეროს ეგიდით დარეგისტრირებული, სადაც  48 ქვეყანა ერთიანდება. ეს არის უკვე 60 წლიანი ორგანიზაცია, საქართველო  კი ზეთისხილის საერთაშორისო საბჭოს წევრი და თავმჯდომარე ქვეყანა 2019 წელს გახდა. საბჭოს ხელმძღვანელი გიორგი სვანიძეა.

ესპანეთში, ქალაქ მადრიდში დაფუძნებულ საერთაშორისო ორგანიზაციაში  48 ქვეყანა ერთიანდება.