საქართველოს ირიგაციასა და მიწაზე ინვესტიციების ინტეგრირებული მიდგომების შემუშავებაში WB დაეხმარება
საქართველოს ირიგაციასა და მიწაზე ინვესტიციების ინტეგრირებული მიდგომების შემუშავებაში მსოფლიო ბანკი (WB) დაეხმარება, - გარემოს დაცვისა და სოფლის მეურნეობის მინისტრის მოადგილემ, ოთარ შამუგიამ მსოფლიო ბანკის მისიის წარმომადგენლებთან სამუშაო შეხვედრა გამართა.
მსოფლიო ბანკის მისიის მხარდაჭერით, საქართველოში ორი მნიშვნელოვანი - საქართველოს ირიგაციისა და მიწის ბაზრის განვითარების პროექტი, მიმდინარეობს, ასევე იგეგმება საქართველოს სოფლის მეურნეობის მდგრადობის ირიგაციისა და მიწის პროექტის განხორციელება.
მხარეებმა GILMDP და GRAIL პროექტების სამოქმედო გეგმები განიხილეს.
ოთარ შამუგიამ აღნიშნა, რომ GILMDP პროექტის განხორციელებისთვის საჭიროა, სწორად შეფასდეს სარწყავი სისტემის მიმდინარე სარეაბილიტაციო სამუშაოები და განსახორციელებელი ღონისძიებების ობიექტური ანალიზი და მხარდაჭერა მოხდეს.
GRAIL პროექტთან დაკავშირებით, მსოფლიო ბანკის მისიამ დაადასტურა მზადყოფნა, მხარი დაუჭიროს მთავრობის ძალისხმევას სოფლის მეურნეობაში, ირიგაციასა და მიწაზე ინვესტიციების ინტეგრირებული მიდგომების შემუშავებაში ფერმერებისა და ზოგადად ეკონომიკის სასარგებლოდ, მათ შორის, კლიმატის მდგრადობას, რომელიც საქართველოს განახლებული ეროვნულ დონეზე განსაზღვრული წვლილის (NDC) განხორციელებას შეუწყობს ხელს.
