პრემიერი: 2030 წელს ღორის, ფრინველისა და საქონლის ხორცის წარმოება უნდა გავაორმაგოთ

მთავრობა სოფლის მეურნეობის განვითარებას მიზნად ისახავს.

“ვგეგმავთ მიწის ფონდის რეგისტრაციას და მოსახლეობის მიწით, ტექნიკით, სოფლის მეურნეობის სპეცილიატების მომსახურებით, ფინანსებზე წვდომით უზრუნველყოფას, გადამამუშავებელი და სარეალიზაციო პირობების შექმნას, ასევე ქართული პროდუქციის პოპულარიზაციას საზღვარგარეთ“, - განაცხადა პრემიერ-მინისტრმა ირაკლი ღარიბაშვილმა პარლამენტში ანგარიშის წარდგენისას და სამომავლო გეგმებზე საუბრისას.

მისი თქმით, 2012 წელს წყალუზრუნველყოფილი იყო 45 000 ჰა, რაც წელს უკვე 172 ჰა-ს შეადგენს.  

“მომდევნო 10 წლის განმავლობაში ჩვენი ამოცანა უნდა იყოს 227 000 ჰა-ს შედეგის მიღება. მომდევნო წლების განმავლობაში ჩვენი გეგმის მიხედვით მთლიანად აღდგება სამელიორაციო სისტემა“,- აღნიშნა ირაკლი ღარიბაშვილმა.

პრემიერის განცხადებით, ეტაპობრივად გაიზრდება სურსათით უზრუნველოფის დონე.

“2030 წელს ჩვენ უნდა გავაორმაგოთ ღორის, ფრინველისა და საქონლის ხორცის წარმოება, ხოლო რძით უზრუნველყოფა, ჩვენი გათვლებით 108%-ს მიაღწევს. მილიარდამდე გაიზრდება ღვინის ექსპორტიდან შემოსული შემოსავლები. ზოგადად სასოფლო-სამეურნეო პროდუქტის ექსპორტი 2012 წელს იყო 500 მლნ დოლარი, 2020 წელს 942 მლნ დოლარამდე გაიზარდა, ხოლო 10 წლიან პერსპექტივაში, ეს მაჩვენებელი უნდა გახდეს მინიმუმ 3 მლრდ დოლარი“, - აღნიშნა ირაკლი ღარიბაშვილმა.