ორბეთში ხის მულჩისა და ბრიკეტების წარმოება დაიწყო

თეთრიწყაროს მუნიციპალიტეტის სოფელ ორბეთში კომპანიამ "ტიჩი" ხის მულჩისა და ბრიკეტის წარმოება დაიწყო.

საწარმოს სიმძლავრე საათში 6-8 ტონა ნედლეულის გადამუშავებაა. საწარმოს შესაქმნელად, სრული ინვესტიცია 200 000 ლარზე მეტია, აქედან 165 000 ლარი სოფლის განვითარების პროგრამის გრანტია.

საწარმოში 14 ადგილობრივია დასაქმებული. ზამთრის პერიოდში კომპანიის „ტიჩი“ წარმოებული ბრიკეტებით დმანისისა და ბოლნისის მუნიციპალიტეტში მოქმედი საჯარო სკოლები მომარაგდება. 

"სოფლის განვითარებისთვის, როგორც სასოფლო-სამეურნეო, ასევე არასასოფლო-სამეურნეო ეკონომიკური აქტივობის ხელშეწყობა სტრატეგიით განსაზღვრული ამოცანებია. ამ მიმართულებით მნიშვნელოვან მიზნობრივ პროექტებს ვახორცილებთ და ადგილობრივ ინიციატივებს ვუწევთ მხარდაჭერას”, - განაცხადა სოფლის განვითარების სააგენტოს დირექტორმა ილია თამარაშვილმა საწარმის დათვალიერებისას.

საქართველოში ევროკავშირის წარმომადგენლობის სოფლის განვითარების, სამოქალაქო უსაფრთხოებისა და კრიზისების მართვის პროგრამების მენეჯერმა ქეთევან ხუციშვილმა აღნიშნა, რომ ევროკავშირი საქართველოს მასშტაბით, სოფლის განვითარების დახმარებისთვის ძალიან ბევრ ღონისძიებას ატარებს. ერთ-ერთი მათგანია გაეროს განვითარების პროგრამის მეშვეობით განხორციელებული პროექტი, რომელიც, სოფლის განვითარების სააგენტოსთან ერთად, საგრანტო პროგრამის მეშვეობით, ადამიანებს აძლევს ინოვაციური ღონისძიებების განვითარების საშუალებას. 

"სოფლის განვითარების პროგრამას" სოფლის განვითარების სააგენტო (RDA) ევროკავშირისა (EU) და გაეროს განვითარების პროგრამის (UNDP) მხარდაჭერით „სოფლისა და სოფლის მეურნეობის განვითარების ევროპის სამეზობლო პროგრამის” (ENPARD) ფარგლებში ახორციელებს.

"სოფლის განვითარების პროგრამა" ქედას, ხულოს, ბორჯომის, ახალქალაქის, თეთრიწყაროს, ყაზბეგის, ლაგოდეხისა და დედოფლისწყაროს მუნიციპალიტეტებში ხორციელდება. პროგრამის მიზანია სოფლად არასასოფლო-სამეურნეო სამეწარმეო საქმიანობის განვითარების მხარდაჭერა. პროგრამის ფარგლებში დაფინანსებულია 48 პროექტი, ინვესტიციის ჯამური ღირებულება 7 მლნ ლარს აჭარბებს, თანადაფინანსება 5 მილიონ ლარზე მეტია.